MNYF-in mipui hruai sual tumah eptute an puh

MNF ṭhalaite chuan thuchhuah siamin, Citizenship (Amendment) Bill 2016 (CAB) chu opposition party ṭhenkhatin tun hnaiah party inbeihna atan an hmang niin an tarlang a, "Mizo mipui kan ṭan rual a ngaih em em laiin party inbeihna atana hmang a, MNF sorkar chu hma la lo angin an puh a, hei hi thu belhchian dâwl lo, mipui rilru hruai sual tumna a ni," an ti.

MNYF chuan, India hmarchhak chief minister zingah Mizoram chief minister Zoramthanga chu CAB duh loa a taka pên chhuak nasa ber nia sawiin, "Mizorama party hrang hrang awm zingah MNF hi party inbeihna tel loa duh lohna lantir nasa ber a ni tih hi kan ngaihdan a ni," an ti a; Cabinet meeting-ah ṭum hnih CAB duh lohna thu pass a nih thu an sawi.

MNYF tarlan danin, January 10, 2019-a Council of Minister ṭhukhawm­in CAB an duh loh thu leh a tawp thlenga an dodal tur thu an pass a, February 12-a Council of Minister ṭhukhawmin an pass nawn leh a ni.

January 23, 2019-a MZP huaihawta Bill duh lohna kawngzawhah minister ṭhenkhat an tel a; February 12-a Joint NGO huaihawta Protest Day-ah Mizo Hnam Rûn khârin minister-te an tel a ni.

January 13, 2019-ah CM Zoramthanga'n prime minister Narendra Modi kâwmin, CAB pass lo turin a ngen a, January 15, 2019-ah Union Home minister Rajnath Singh a nge leh. January 29, 2019-ah Guwahati-a India hmarchhak state-a political party hrang hrang leader-te CAB chungchanga inhmuhkhawmnaah MNF president Zoramthanga a tel a, Mizoram political party zingah tel awmchhun a ni.