Thla 6 chhungin thisen unit 20,201 pek a ni

Sorkar kum kal mek 2018-19 chhunga April-December 2018 (thla kua) inkar chhung khan Mizoram pumah thisen unit 20,201 pek a ni a, chu'ng zinga unit 17,422 chu pek bik nei loa a thlawna pek, voluntary donation niin, chu chu thisen pek zawng zawng aṭangin 86.24% a ni.

Mizoram State AIDS Control Society (MSACS) chhinchhiah danin, April-December 2018 chhunga Mizoram puma thisen pek zinga a thlawna pek chu unit 17,422 a nih laiin, blood donation camp bika pek zat chu unit 13,972 a ni a, unit 13,972 pe tur hian pawl hrang hrangin blood donation camp vawi 350 an buatsaih.

Mizorama district pariata blood bank 10 zingah Serchhip District Hospital-ah voluntary donation percentage a sang ber a, 97.98% a tling; thisen pek zawng zawng unit 793 zinga unit 777 chu voluntary donation a ni. A thlawna pek percentage san lamah Champhai District Hospital chu pahnihna a ni a, 94.59% a tling.

Hetih lai hian, Lunglei Civil Hospital-ah voluntary donation hniam berin, 74.01% a ni a; thisen pek zawng zawng unit 1,747 zinga unit 1,293 chu voluntary donation a ni. Lunglei Civil Hospital hi Lawngtlai District Hospital-in an dawt a, thisen pek zawng zawng unit 988 zinga unit 737 (74.60%) chu a thlawna pek a ni. 

Aizawl khawpuia blood bank pahnih zinga pakhat zawk, Aizawl Civil Hospital (ACH) Blood Bank chu Model Blood Bank tih a ni a, donation camp, thisen pek zawng zawng pawh a tam ber.

ACH-ah hian thla kaw chhung khan thisen unit 10,330 pek niin, chu'ng zinga unit 9,112 (88.21%) chu voluntary donation a ni ACH Blood Bank dawttu chu Synod Hospital a ni a, thisen unit 2,405 an hmuh zinga unit 2,093 (87.03%) chu voluntary donation a ni.