MNF-te záwngte khuang nei ang an ni - Zodintluanga

Mizoram Pradesh Congress Commi­ttee (MPCC) Campaign Co­mmittee chu nimin khan an chairman Zo­din­tluanga, MLA hoin MPCC President room-ah an ṭhu a; Lok Sabha inthlanpui awm turah chak ngei tumin theihtawp an chhuah dawn tih an tarlang.

Meeting kaihruaitu Zodintluanga chuan, MNF-te chu záwngte khuang nei ang mai an nia sawiin, "A hman hmanin an béng a, an duh duh an puang a, a hman hman an che pap pap a, rei lo têah insawifiah theih rual lohin an buai vat ang," a ti.

Congress sorkarin dan hnuaia felfai taka tender chhanga hna neitute hnathawh lai ngei pawh an chhuhsak duh tih sawiin, "An chêt dan dik lo leh uchuak tak hi theihtawpin kan dodalin kan bei lêt dawn a ni," a ti bawk.

Zodintluanga chuan, Citizenship (Amendment) Bill chungchangah hmarchhak state dang sorkarte na taka an chêt laiin, NDA sorkarah tlâktlum loh an hlauh vanga an che ngam lo-ah a puh a; mipui duh ang leh phût angin an che ngam lo tih a sawi.