KHAWTHLIR

Chief secretary kal chhuak Arvind Ray thlahna hun chu, nimin khan chief secretary Lalnunmawia Chuaungo hoin Secretariat conference hall-ah hman a ni.

Student Christian Movement of India (SCMI) Aizawl Theological College unit chuan, nimin khan an college-ah blood donation camp an huaihawt a, Synod Hospital tan mipa 42-in thisen unit 42 an pe.

Lawngtlai DC atana ruat thar Shashanka Ala, IAS chuan nimin khan Lawngtlai DC pisaah a hna thar a zawm a, bawrhsap kal chhuak N Chakhai, MCS hnen aṭangin mawhphurhna a la ṭan. Shashanka Ala hi Hyderabad khaw chhuak a ni a, Indian Institute of Technology (IIT) Madras aṭanga Electronic Engineering a zir zawh hnuah kum 2014 khan IAS-ah tlingin, AGMUT cadre a ni a; Lawngtlai DC a nih hma hian Supply director a ni.

Central YMA hnuaia SRS leh Assam Rifles ṭangkawp chuan nimin zing dar 1:30 khan heroin hawng 5 leh can 30 an man a, a neitua puh Thanghnuna (50) s/o Lalthangthuama, Zokhawthar nia inchhál leh Vanlkalrenga s/o C Lalbiakkima, Nursery Veng, Aizawl nia inchhál an man bawk. Heroin an man hi Rs. 2,50,000 hû a ni. 

GAD secretary Lalthangpuia Sailo hoin nimin khan a pisaah February 20, Mizoram State Day vawi 32-na lawm dan tur rêl a ni. Ruahman dan chuan, State Day hi chawhma dar 11 aṭangin Vanapa Hall-ah lawm a ni dawn a, sorkar hnathawkte leh mi zawng zawng tel tura ruahmanna siam a ni.

Nimin khan Siaha district tan MADC Forest Hall-ah District Level Fire Prevention Committee te buatsaihin Fire Prevention Week 2019 hawn a ni a, hawnna inkhawm hi Siaha SDC Ngulzathuama'n kaihruaiin, MADC-a executive member (Forest) F Lawmkima khuallian a ni. Tarlan danin, kum 2018-19 chhungin Siaha district-ah kângmei vawi 155 a chhuak a, jhumland hectare 364.1-a zau leh non-jhumland hectare 2-a zah a kâng chhia a; ram tikangtu mi paruk lakah FIR thehluh niin, mi 10 aia tlem lo pawisa chawitir an ni.