Citizenship (Amendment) Bill chungchangah Chief Minister-in lawmthu a sawi

Rajya Sabha-ah Citizenship (Amendment) Bill, 2016 (CAB) tihtawp a ni taa ngaih a nih avangin chief minister Zoramthanga chuan lawmthu a sawi.

Sorkar thuchhuah tarlan danin, Chief Minister chuan, Rajya Sabha chu tâwp chin awm loin khâr a ni ta a, CAB pawh kalpui a ni dawn ta lo tih sawiin, "Tun sorkarna kal mekah chuan CAB hi lak lohin a awm dawn niin a lang ta a, a lawmawm kan ti hle. India hmarchhak state mipuite hmalakna rah a nih bakah, Mizorama kohhran, NGO zawng zawng, political party hrang hrang, sorkar leh mipuite lungrual taka kan theihna zawng zawng nena kan ṭanhona rah a lang a ni," a ti.

CM Zoramthanga chuan, "Mizo­ramah chuan NGO Coordination Committee-te leh kohhrante'n hma an lakna a fakawm a, he kan thil tum hlawhtlinnaah hian a bik takin NGO Coordination Committee chungah lawmthu kan sawi a ni," a ti a; political party hrang hrangin kawng chi tinrenga hma an lak thu te, sorkar ang pawhin a theih ang anga hmalak a nih thu te, Prime Minister hnenah hmaichhanah a thlen tawh thu leh Union Home Minister pawh vawi hnih a sawipui tawh thute a tarlang. 

Chief Minister chuan, CAB chu nakinah kalpui ṭhat leh tumna awm ta se, ṭanruala ven zui zel a ngai dawn tih sawiin, "Tunah chuan NGO, kohhran, sorkar, mipui, political party hrang hrang thawhhona rah kan hmu hi a lawmawm ka tiin, hma latute zawng zawng chungah lawmthu ka sawi a ni," a ti.