407 truck hmangin Salem Vengah Buhfai leh thil dang phur lut duh lo

407 Vehicle Owners Association chuan February 12, Thawhlehni aṭang khan Salem Veng, Aizawl veng chhungah ration buhfai leh bungraw dang reng reng 407 truck hmangin an phur lut duh lo a, an thil phût tihhlawhtlin a nih hma chuan phurh loh an tum tih an puang.

407 Vehicle Owners Association chuan, February 8, 2019-a an member-in Salem Venga ration buhfai a dah haw lam chu zan dar 6:30 velah Salem Veng chhungah zu rûi kawngpui kama zu inte’n kawng kian ṭha duh loin, driver Lalkhawngaiha, Zemabawk leh motor neitu Pahlira, Zemabawk-te chu motor aṭangin an pawtthla a, kut an thlak tih an sawi a; driver-te kutthlak an ni chu an dem thu leh kutthlaktute chu rang taka mana an phu tâwka hrem ngei an phût thu an tarlang.

Motor aṭanga driver pawh­thlak a nih avangin truck pawh kawng thlangah a liam tih sawiin, "Pawi kan ti a, he thila mawhphurtute hi man chhuak a, dan anga an phû tâwk hrem ngei kan phût tlat a ni," an ti a; driver Lalkhawngaiha leh motor neitu Pahlira te hnena ngaihdam dilna leh thupha chawina vawi khatmah kutthlaktute'n an la nei lo chu an dem tak zet thu an sawi.

407 Vehicle Owners Association chuan, "Pawi khawihtute laka kan thil phûtte hi pawi khawihtute hian an tihlawhtling lo a nih chuan, February 12, 2019 aṭanga thu leh awm hma chu Salem Veng tan ration buhfai leh bungraw chi hrang hrangte phurh luh tawh loh ni se kan ti," an ti.

An tarlan danin, Salem Veng­ah zu ruite'n motor aṭanga driver an pawhthlak avangin motor chu kawng thlangah a liam a, motor-a chuang ve dang Lalhluna, Zuangtui Muanna Veng chu liam­puiin, a hliam a, Aizawl Civil Hospital-ah enkawl mek a ni. Lalhluna hi pawi khawihtute'n zangnadawmna an pek ngei an phût bawk.