Kolasib-ah CS
Chief secretary Lalmalsawma chuan nimin khan Kolasib a tlawh a, Kolasib district-a sorkar offcial-te Circuit House-ah thil pawimawh hrang hrang a sawipui. CS hian vawiinah Bairabi a tlawh ang.
Painting Exhibition
Saitluanga Sailo 1st Solo Painting Exhibition leh S&S Art Gallery, Zarkawta mi chu nimin khan Information & Public Relations minister Lal Thanzara'n a hawng. Lal Thanzara chuan, Mizote'n artist-te tun aia ngaihsan nachang an hriat a ṭul thu leh an kut chhuakte hlutsak a ṭul thu a sawi.
Permit siam tha
Transport department chuan thuchhuah siamin, taxi, all Mizoram permit pek a nih tawh loh thu a tarlang a; "Taxi, pawimawh bik vanga zin chhuak tur chuan special road permit an dil thei a. All Mizoram maxicab permit pawh a awm tawh lo ang a, service route bik chauha tlân turin permit pek a ni ang," a ti.
Hri danna sawiho
Mamit district-a hri danna kokim zawka pek a nih theih dan tur chu nimin khan Mamit addl. DC H Lianzela hoin a pisa-ah an sawiho. Zenghri danna pek thawhkhatnaah Mamit district chhunga naupang 10,493 pek an ni.
Kal phal lo
Traffic SP chuan thuchhuah siamin, Mission Veng Presbyterian biak-in leh SR Vala road péng inkar kawngpui chu vawiin zing dar 9 aṭanga thawm ṭhat a nih dawn avangin hna thawh chhungin kawngpuiah lirthei tlân phal a nih loh thu a tarlang. Kawngpui khâr a nih chhung hian Model Veng aṭanga Kulikawn Veng lam panna leh Mission Vengthlang aṭanga Bungkawn Veng lam panna kawngpuiahte kal tura tih a ni.
Mi harsa in sa
Ruantlang branch YMA chuan tun hnai khan an huam chhunga mi harsa chhungkaw pakhat in an saksak. In hi a dung ft. 24 leh a vâng ft. 20-a zaua sak a ni a, a sakna senso chu Ruantlang khuaa mi tlawmngaite thawhkhawm a ni.
