Lei dawha hma la tawk loah MPC-in sorkar an puh

Nimina MPC party office bearer meeting chuan resolution pass in, Mizoram sorkar chu Sihhmui leh Lengpui inkara Tlawng lei chim dawh ṭha tura hma la tawk loa an ngaih thu an tarlang.

MPC resolution chuan, "Mizoram leh Tripura inkalpawhna leh India ram state dangte thlawhna hmanga zinna kawngpui ber Aizawl-Lengpui panna kawng pawimawh taka lei chim, tun thlenga dawh loa a la awm hi mawhphurhna la ngam sorkar (non-responsible government) kan neih vangah kan ngai," a ti.

MPC chuan, lei dawh ṭhat a nih lawk loh avangin ei leh bar zawnna lamah mipuiin sum leh pai ṭul lo takin an sên ral phah nia sawiin, sorkar chu mipui harsatna hre tawk lo leh chhût nachang hre loah an puh a, "Lei pawimawh lutuk venghim tur hmalakna a neih loh avangin Mizoramah lei hrang hrang a khát tâwkin a chim fo a, chhiatna rapthlak tak tak a thleng fo. Sokar inthlahdah vang liau liauvah kan ngai," an ti.

Tlawng lei chim chhan chhuitu Inquiry-in report an thehluh tawh avangin MPC chuan a rang thei ang bera lei siam ṭha turin sorkar an phût a ni.