Rualbanlo chhawmdawlna kalpui dan zirho

National Institute for Empowerment of Persons with Multiple Disabilities (NIEPMD), Chennai, Zoram Entu Pawl (ZEP) leh FIWDC-Peace Home te chuan nimin aṭang khan Aijal Club-ah rualbanlote chhawmdawlna chung-chang zirhona an buatsaih a, Social Welfare minister PC Lalthanliana'n a hawng.

PC Lalthanliana chuan, rualbanlote tan a theih ang anga hmalak zel a nih thu a sawi a, "Commissioner for Persons with Disabilities kan nei tawh a, sorkar building-ahte ramp siam mek zel a ni," a ti.

Kohhranah te, NGO leh khawtlangahte rualbanlote tana an hnathawh dante chu lawmawm a tih thu a sawi rualin, PC Lalthanliana chuan, "Rualbanlohna tihtlem a nih theih nan ṭan lak lehzual a pawimawh a, chumi atan chuan early intervention a pawimawh hle a ni," a ti. Sorkarin Disabled Pension Scheme te, NHF loan-te interest tlemtêin a pe ṭhin a, mahse, rulhna lam a ṭhat loh avangin loan pek chhunzawm a ni rih lo tih a sawi.

Social Welfare Minister chuan, rualbanlote hmasawnna atan an chenpuite an pawimawh thu a sawi a, "Workshop hian rualbanlote tan hmasawnna leh
ṭangkaina tam tak a thlen ngei ka beisei," a ti.

Zirhonaah hian sorkar department aiawh, college zirlai, tlawmngai pawl, local council hruaitute leh rualbanlo kaihhnawih pawl hrang hrangte an tel.