Mizoram sorkarin IAF hnenah Lengpui Airport a hlan dawn lo

Mizoram sorkar chuan Indian Air Force (IAF) hnena Lengpui Airport hlan lo turin thutlukna a siam tawh a, inbiakna pawh kalpui chhunzawm a ni tawh lo.

Lengpui Airport inhlan tur chungchangah hian Mizoram sorkar leh IAF hotute chu October 1, 2015 khan an inbia a, mahse Mizoram sorkarin an duh leh loh avangin inbiak chhunzawm a ni lo.

GAD (Aviation Wing) hotute hnen
aṭanga thu dawn danin, IAF hnena Lengpui Airport hlan hi chief minister Lal Thanhawla'n a duh lo a ni.

Thu dawn danin, ruahmanna hmasaah chuan IAF kuta Lengpui Airport hlan tur hian ruahmanna eng emaw chen kalpui tawh a ni a; airport pumpui ni loin, hmun ṭhenkhat chu IAF kutah hian hlan tum niin, Terminal Building erawh telh a ni lo.

Hetih lai hian, Airport Authority of India (AAI) kuta Lengpui Airport hlan tumna chu kalpui a la ni reng thung a, AAI hotute leh Mizoram sorkar pawh an la inbe reng a ni.

Mizoram sorkar leh AAI hi venhimna chungchangah an thu a inhmu lo a; AAI-in airport an kuta a awm hnua state sorkar kuta security awm tura an tih chu Mizoram sorkarin a pawm thei lo. AAI-in security an kuta dah an rem ti thei a nih chuan an kuta Lengpui Airport hlan turin Mizoram sorkar chuan harsatna dang an nei lo nia thu dawn a ni.