Horticulture College class ṭan tum

Mizorama Horticulture College din tura inbuatsaihna kal mekah kumin chhunga class ṭan thei turin ruahmanna siam a ni.

Tun hnaia Delhi-a zin, Horticulture minister PC Lalthanliana chuan Central Agriculture University-a Vice Chancellor kawmin, kuminah zirlai 20 nena class ṭan thei tura ṭan lak nise an ti. Thenzawl hmuna college din fel a nih hma chuan class ṭanna atan hian Selesih-a College of Veterinary and Animal Husbandry Sciences hmun ruahman a ni.

Hetihlai hian Horticulture College dinna tura ruahman Thenzawl ram chu tun hnai khan sorkar laipui aṭangin official-ten an endik tawh a, kumin chhung ngeia hna ṭan thei turin a sakna tur lung pawh phum tum nia thudawn a ni.

College hmun tur endiknaah hian building sa tura Central Agriculture University-in a thlan M/s NPCC Ltd., architect- consultant M/s CP&DS Associates-te, Imphal-a Central Agriculture University aṭangin professor leh engineer-te an tel a ni.