Mizoram district khawpui tinah Road Safety Week hawn a ni

Nimin khan Mizoram hmun hrang hrangah 27th Road Safety Week hawn a ni a, Aizawlah chuan Transport dept. building thar kawtah Transport minister John Rotluangliana'n a hawng.

John Rotluangliana chuan Road Safety Week-in a tum ber chu ‘Lirthei accident laka kan fihlim theih nan a takin hma I la ang u’ tih a nih thu sawiin, "Chumi ti hlawhtling tur chuan lirthei khalhtute leh lirthei neitute thawhhona ṭha tak neih a
ṭul a ni," a ti.

Lirthei khalhtute ngaih-tuahna la peng thei thil, zu leh ruihtheih thil chihrang hrangte, music ring lutuk leh earphone ngaihthlakte hi accident thlen tirtu tam ber an nih thu sawiin Transport Minister chuan, passenger-te leh lirthei neitute chu an lirthei chuanna tur leh a khaltute hetiang kawnga an fihlim theihnan fimkhur turin a chah.

Road Safety Week hawnna inkhawm hi Transport secretary Hrangtawna'n kaihruaiin, Traffic SP, Transport director leh Zoram Drivers Union hruai-tute pawh an tel.

Lungleiah chuan DC Abhijit Vijay Chaudhuri chuan Road Safety Week hi a hawng. Lunglei DC chuan week hman chhung chauh ni lo, engtik lai pawhin lirthei khalhtute chu fimkhur a ngaih thu sawiin, rui chungin lirthei khalh lo tur leh chak lutuka lirthei khalh hi ching lo turin lirthei khalhtute a chah.

Thusawitu dang, Lunglei SP Zosangliana chuan sorkar-in traffic chungchang leh thil dang-ah thupek leh dan a siam-te chu thuawih taka zawm a ngaih thu sawiin, "Lirthei khalhtuten kawnga kal mipui-te ngaichang an ngaihchan thiam a, chutiang bawkin mipuite pawhin him zawk nan lirthei tibuai zawnga an awm a pawimawh," a ti.

Champhaiah chuan Road Safety Week hi CHANEM kawt-ah Champhai SP RP Meena-i'n a hawng. Week pual hian police leh Transport dept. hnathawkte chuan lirthei document pawimawhte an endik nghal.

Champhai SP chuan tunlai a mihring khawsak chetvel nana kan hman tam ber lirthei laka mitinte kan him tlan leh zual theihna tura sorkarin Road Safety Week a buatsaih chu lawmawm a tih thu sawiin, "He hapta hian lirthei enkawltute leh lirthei hmangtute tan kum tluana fimkhurna leh himna thlentu ni thei se a duhawm hle," a ti.

Road Safety Week hi Ser-chhipah chuan DC office kawt-ah DC Dr. Lalrozama'n a hawng. Serchhip DC chuan lirthei chesualin kawng tam takin nunphung a nghawng thei tih sawiin, "Motor accident chhan tam ber pakhat chu fimkhur loh vang leh hmangchang hriat loh vang a ni," a ti a, lirthei khalhtu tam tak chuan an lirthei dinhmun an hriat chian loh thu a sawi.

Saihaah chuan ditrict transport officer (DTO) Marilyn Rualzakhumthangi'n Road Safety Week hi a hawng. Week hawnnaah hian Saiha district-ah lirthei hrang hrang taxi 26, auto rickshow 107, maxi cab 32 leh LMV 92 a awm thu tarlan a ni.

Road Safety Week hi addl. SP SK Hmar in Kolasibah chuan a hawng. SK Hmar chuan lirthei chetsualna tam zawk chu ruihtheih thil avang-in a ni fo ṭhin thu sawiin, "A bik takin lirthei khalhtute chu zu leh ruihtheih thil lakah an insum a pawimawh a ni," a ti.

Road Safety Week chhung hian Kolasiba maxicab, auto leh taxi khalhtute tan DTO ruahmanna hnuaiah training pek an ni dawn.

Lawngtlaiah chuan Road Safety Week hi DTO Lallawmawma'n DC conference hall-ah a hawng. Week hawnnaah hian Lawngtlai MVI Joseph Lalthansanga'n MVI dan chi hrang hrang lirthei khalhtute a zirtir a, ZDU aiawhin R Liankunga lirthei khalhtute tana nungchang mawi leh dawm dan ṭha a sawi thung.

Road Safety Week hi Mamit-ah chuan DC office tualah addl. DC H Lianzela'n a hawng. Mamitah hian week chhungin taxi, maxi cab leh sorkar driver ṭha thlan a ni dawn.

Week hawnaa tarlan a nih danin kum 2015 chhung khan lirthei chetsulana ṭum hnih a thleng a, mi pahnihin thih phahin, mi pahnih vekin hliam an tuar.