PMEGP chungchang zirna buatsaih

Mizoram KVI Board chuan, nimin khan Chanmari YMA Hall-ah State Level Workshop on Prime Minister Employment Generation Programme (PMEGP) an buatsaih a, KVIC (North East Zone) member Narayan Chandra Barkataky-in a hmanpui.

Narayan Chandra Barkataky chuan, PMEGP hamṭhatna dawngtute chu first generation entrepreneur an nih thu sawiin, "Mizoram hi lekhathiam state in nih ang ngeiin PMEGP hlawhtlinna pawh hi beiseina sang tak nen kan thlir a ni," a ti a; workshop-a telte chu ngaihtuahna fím tak hmanga an thil siam hralhna lam thlenga ngaihtuahna neia project siam turin a chah.

Mizoram KVI Board chairman K Lianzuala chuan, "State kan nih angin duat takin sorkar laipuiin chanvo min pe a ni," a ti a; PMEGP beneficiary-te chu loan an lakte rûl leh vek ṭhin tur leh tumruhna neia teirei peih turin a fuih.

Workshop-a tarlan danin, PMEGP hnuaia loan late hi thingtlangah chuan margin money 35% a nih laiin, khaw-puiah chuan 25% a ni.