Mipui hmakhua kan ngaih avangin Chhiah hniam berin kan la: Rotluangliana

Transport minister John Rotluangliana chuan nimin aṭanga hman ṭan, Motor Vehicle Tax leh Passengers & Goods Tax rate chu mipui hmakhua an ngaih avangin sorkar laipuiin a phal chinah a hniam thei ang bera an lak thu a sawi.

Road Safety Week hawnnaah nimin khan John Rotluangliana hian Motor Vehicle Tax leh Passen-gers & Goods Tax Rate a tlangzarh.

Transport Minister sawi danin, Mizoram sorkarin tuna lirthei aṭanga chhiah lak tur rate thar a tihchhuah chu Transport Development Council meeting-in a lo rel tawh bawhzuina a ni a; sorkar laipui chuan state sorkar tinte chu a tlem berah 6% life-time tax la turin a hriattir a ni.

Mizoram sorkar chuan mipuite hmakhua ngaiin, sorkar laipui phal china a hniam thei ang ber 6% a la dawn. He dan hnuaiah hian private motor zawng zawng, auto-rickshaw, taxi leh maxicab-te chuan lifetime tax (kum 15 atan), motor man (VAT chhût hma) aṭanga 6% an pek vek a ngai dawn a ni.

Motor register sa, lifetime tax pe tawhte chuan an lirthei upat dan azirin an tax pek tawh aṭanga rate bithliah sa an pek tel a ngai ang. Passenger and Goods Tax pawh kum 25 aia rei rate ngai hman a nih hnuin February 8, 2016 aṭanga hman ṭan turin rate thar siam a ni.

Transport department pawhin thuchhuah siam-in, rate thar khawn turin an inpeih tawh tih an tarlang a, "Tax rate tharah chuan private motor (non-transport vehicle) zawng zawng leh auto-rickshaw, taxi leh maxicab-te'n a tlem berah life-time tax (kum 15), motor man (VAT chhût hma) aṭanga 6% pek vek tur a ni," an ti a; rate thar chu state dang pawhin an hmang niin an sawi.

Transport department tarlan danin, vehicle tax hi sorkar laipui thu pek angin computerised vek a ni a, rate thar pawh computer software-ah siam rem a ngai. Chuvang chuan government gazette chhuah ruala hman nghal a ni lo. Tax rate thar hmanga lirthei chhiah lak a nih chuan mi hausa, motor man to leitute'n chhiah an chawi tam ang a, sorkar sum hmuh pawh a pung tura beisei a ni.