Tun season Premier League ṭan dawn khan, champion tura rin kai an sawi a, Manchester City leh Arsenal hming a ri ring hle - a hma zawnga lam tel ṭhin Liverpool lam tel an awm mang bar lo a, a chhan ber chu coach Jurgen Klopp-a'n a chhuahsan tak vang a ni.

Mahse, November international break a thlen meuh chuan Liverpool chu Premier League hmahruaitu an ni ta a, thai bo theih an ni lo - Arsenal zawk chu a hnung tawlh an ni a, City pawhin beisei an phak lo.

Season ṭantira lam tel loh club kha champion tura rinkai ber an ni leh ta a, City leh Arsenal hian an um pha leh thei ang em? tiin mipuiin zawhna an pe. Arne Slot-a'n a lu a kawlh satliah lo tih a pholang a, Premier League manager ṭhate a el phak nghal.

Liverpool hian tun season-a league match 11 an khelh aṭangin vawi kua hnehna an chang thei a, vawi khat draw neiin, vawi khat an tlawm - anmahni hnaih bertu City aia an sanna chu point nga a ni a, Arsenal phei chuan point kuain an phak lo tawh!

Hmahruaitu Liverpool

Season ṭantir khan Opta 'supercomputer' chuan Premier League champion tur a chhut a, he chhutna aṭang chuan Liverpool hi champion dinhmuna an dinna chu 5.1% a ni. Mahse, tunah chuan thawnthu a danglam tawh a, he supercomputer vek hian Liverpool hi 58.3% champion-na chance nei angin a chhut leh tawh.

Reds midfielder Alexis Mac Allister chuan, "Season ṭantir kha chuan champion beiseiawm zingah ka inchhiar tel lo ang. Mahse, tunah chuan chhiar tel loh chi kan ni tawh lo," a ti a, a team a ringtawk hle.

Liverpool hi Premier League match 11 khelha point ngaa sang fal thei team parukna an ni - a hmaa he record lo siam tawh zawng zawngte kha an champion zui vek a, hetah hian 2019-20 season-a Liverpool an champion pawh kha a tel.

Reds hian 'Big Six' club zingah Manchester United (3-0), Chelsea (2-1) leh Arsenal (2-2) an hmachhawn tawh a, tlawm an la nei lo. October fixture hautak an paltlang a, December-in a hmuak leh mek - ni 1 khat zanah Manchester City an mikhual dawn a, hei hian an hma hun thui takin a hril ang.

Arsenal an kiang?

Tun hnai season hnih chhung City leh Arsenal an inum a, hei vang hian Gunners hun a her chhuak ve tawh tura ngaitu an tam hle - mahse, an beisei ang a ni lo a, match 11 an khelh meuh chuan point 11-in hmahruaitu an thlau ta.

Premier League-ah match 11 khelh hnua point kuaa hmahruaitu thlau team champion awmchhun chu Manchester City chiah an ni a, mahse, anmahnin match 11 khel ngawt mah se, hmahruaitu Arsenal-in match 12 an khel thung - hei hi 2013-14 season a ni.

Arsenal boss Mikel Arteta chuan, "Hnehna chan a, chak zel a, chak zel hi kan mamawh chu a ni mai - kan khingpuite hi an chak lo ve ngai bawk si lo," a ti a, an tan nomawi chawi turin tawlhthluk a thiang tawh lo tih a sawi. A harsa dawn tih erawh a chiang.

Hetihrual hian Gunners hian an captain Martin Odegaard chu hun rei tak an chhawr thei lo tih hriat telsak a ṭha a, Norwegian midfielder hi team khaipa ber niin, a awm chuan result a danglam ṭhin - tunah chuan a dam leh tawh.

City an zuai

Pep Guardiola-a'n coach a nih hnua a vawi khat nan, penalty vanga an tlawm chhiar tel lohin inelna hrang hrangah match li a zawnin a club a tlawmpui a, a awihawm loh zawk hial - hetihlaia Liverpool an lo chet ṭhat bawk si avangin City an talbuai tiin a sawi theih a, point ngain hmahruaitu an phak lo.

Season ṭantira 82% a champion-na chance nei anga chhut City hi tunah chuan 38% chiah pek an ni ta a, an dinhmun a inthlak danglam chak hle. Pep chuan, "Kum sarih chhunga Premier League nomawi paruk chawi meuh chuan, team dangin chawi ve tawh an phu pawh a ni mahna," a ti.

Spanish coach hi a ṭawngkam aṭangin a tlawm deuh niin a lang a, mahse, an squad a chhah a, Pep-a thluak a ṭha bawk a, an tho leh mai zel - City meuh han thaibo hi chu thil harsa tak chu a la ni tho!

City hian season thum liam ta chhung khan Krismas zawha Premier League-a tlawm hi vawi li chauh an nei a, season li a zawna an champion season-ah te khan point ruk ngawta hmahruaitu phak loh lai an nei vek - April 2023 khan hmahruaitu Arsenal chu point riat ngawtin an phak lo a, season tawpah erawh nomawi chawitu an ni leh ta tho a ni.

Chelsea ve hi?

Season ṭantirah champion tura sawi zingah Chelsea an tel lo a, a awm lo hran lo - coach thar Enzo Maresca an la lut chauh a, team indinthar hna thawk mek an nih bawk avangin eng ang nge London club aṭang hian beisei tur kha hriatthiam a harsa.

Mahse, beisei phak bakin Maresca hnuaiah an insiamrem chak a, table-ah pathumna ni mekin, Arsenal, Nottingham Forest leh Brighton & Hove Albion te nen point 19 ṭheuh an nei - champion a beisei ngam.

Maresca erawh a ṭawng fimkhur hle. Italian coach chuan, "City leh Arsenal kan la phak lo - manager ngai enkawlna hnuaiah, ni tin kum kua chhung an training ho tawh a ni," a ti a, anni chu an la inenkawl rei tawk loh thu a sawi.

Kum 44 mi coach chuan sawi zawmin, "Keini aia team ṭha an awm thu ka sawi avangin champion kan tum dawn lo ka tihna a ni lo. Khawvela team langsar ber pawl kan ni alawm," a ti a, Blues inkhelh chhan chu champion a ni, tih a tarlang.

Team dang

Match 11 aṭanga teh tur a nih chuan Chelsea leh Arsenal point hmuh ang zat hmutu Brighton leh Nottingham an awm a, mahse, squad chhah dan leh team enin, club pahnih hi chu champion beiseiawma chhiar a fuh chiah lo!

Manchester United pawhin coach thar Rúben Amorim nei mah se, Portuguese coach hnuaia champion thut tura beisei chi an ni lo - season tharah Champions League an khel ringawt a nih pawhin an tan result ṭha a ni dawn.

United hi table-ah 13-na an ni mek a, match 11 aṭangin point 15 an nei a, hmahruaitu chu sawi loh, palina chin an phak lohna pawh point li a ni. Amorim tan hna a awlsam dawn lo.

Hetihlai hian Big Six zinga mi Tottenham Hotspur pawhin beisei an la phak thei lo. Spurs hian match 11-ah point 16 an nei a, season hmang chhe tak United aia an sanna hi point khat chauh a ni ve tho a, an ropui bik lo hle.