National school games-ah gold medal la

68th National School Games (Taekwondo) khelh zawh takah Mizo rawlthar Lalruatkima chuan 51kg category-ah gold medal a la. National School Games khelh tawh chinah Mizoin gold medal an lakna hmasa ber a ni.

Inelna hi November 8-12 chhung khan Vidhisa, Madhya Pradesh-ah neih niin, Govt. Venglai H/S, Lunglei Venglai zirlai naupang Ruatkima hian gold medal la tur hian match hmasa berah Himachal Pradesh chu 14-1 14-2 in a hneh.

Karnataka aiawhtu nen intum lehin 14-1, 15-2 in a sawp zui a, quarterfinal-ah KVS (Punjab) chu 6-6(1-0), 8-0 in a hneh. Semifinal-ah Uttar Pradesh aiawh erawh 1 round ah 1-5 a game hloh hnuah, 2 round-ah in siamṭhain 12-6 in game a la a, final round ah 8-2 in a hnehin final a lut.

Final-ah hian kum hluia champion lai, Manipur mi nen an intum a, Mahse 8-3, 5-2 a hnehna changin a chungnung ta ber a ni.

Lawngtlai Vengpui mi Lalruatkima hi Lawngtlai aṭanga taekwondo zir ṭan niin, tunah hian SAI Extension Center, Lungleiah a zir mek.

Mizoram State Sports Council leh Mizoram Amateur Taekwondo Association bakah School Education Department te chuan Lalruatkima hi an lawmpui thu an sawi a, Mizoram an lo thlen hunah pawh lawmna hun hmanpui an tum bawk a ni.

School Games (Under 17) ah hian Mizoram aṭangin player 3 kalin Albert Lalrinfela'n a hruai a ni.