Curry hoin Golden State an chak

Steph Curry-a point 37 neih hmangin Golden State Warriors chuan an mikhual Dallas Mavericks chu 120-117 in an hneh a, an player hlui Klay Thompson kir lehna inkhelah Curry a langsar ber.

Nimin zing NBA Cup inkhelah Curry hian innghahna tlak a nihzia chu a takin a lantir chiang hle. Golden State lam point hnuhnung 12 chu ama neih vek a ni a, heng zingah hian 3-points mawi bika a vawm luh pawh telin a team hi 118-114 in a dah sang.

Chase Center-ah hian kum 34 mi Thompson chu Mavericks lam jersey ha chungin a inlan a, hun rei tak chhung a lo khelh tawhna Warriors lakah hian point 22 neiin a khel ṭha thawkhat hle.

Curry leh Thompson te hi kum 13 chhung an khel dun, basketball inelna ngaihhlut ber NBA title pawh vawi li lai an la dun a, khawvela team hmunnawm leh ṭha bik zingah Golden State hi an hlangkai ṭhin.

American star Curry chuan, "Season thar atana kan inbuatsaih angin kan khel thei a, kan phu ang ngeiin hnehna kan chang bawk," tiin an khelh danah a lungawi thu a sawi a, hma an sawn zel tih a sawi bawk.

Thompson chungchang sawi zuiin Curry chuan, "Court chhungah chauh a ni lo a, khelmual pawnah pawh hun kan hmang dun tam a, a nihna takah chuan ball ka chan hian Klay pek hi ka tum ṭhin a, chumi rilru chu ka la paih thei lo," a ti.

A club hlui hmachhawntu Thompson chuan, "Golden State Warriors hmachhawntu nih chu thil nuam tak a ni lo hle. A tawpah erawh Steph-a ropuizia kan hmu chiang e," tiin a sawi.

Inkhel dangah Portland Trail Blazers chuan Minnesota Timberwolves chu 122-108 in an hneh. Milwaukee Bucks pawhin inkhel inhnehtawk takah Toronto Raptors chu 99-85 in an hneh ve bawk.