Messi leh Argentina inlan a lo hun leh dawn ta

Lionel Messi-a'n football huangah a thlen theih chin sang ber a thleng chhuak tawh a, mahse an ram Argentina tan theihtawp a la chhuah zui zel - Zirtawpni zing dar 5:00 hian World Cup 2026 qualifier khel turin Paraguay an lenchilh ang.

Argentina player tam zawk hi Europe khawmualpuia inkhel ṭhin an ni a, club lam an eizawnna hmun aṭangin South America a hla hle - chuvangin player tan ram tana kohna chhan hi thil awlsam a ni ṭhin lo, an khelhna club lamah nghawng a nei ṭhin bawk.

Messi pawh a kum a tam hnuah chuan hahdam deuh zawka inkhelh theihna a ngaihtuah. Europe aṭanga South America lama zinkawng hautak zawh reng ai chuan Major League Soccer club Inter Miami a zawm a, tun hma aia hahdam deuhin ram tan a inlan thei.

World champion coach Lionel Scaloni-a'n a captain hi inkhel turin a inpeih tih a sawi a, a kerek hliam a dam chiang tawh. A ṭhiante nen Thawhlehni tlai khan training an nei a, harsatna nei loa inlan thei tura ngaih a ni.

Argentina player zingah harsatna nei erawh an awm. Premier League khel - Cristian Romero, Facundo Buonanotte, Lisandro Martínez, Emiliano Martínez leh Enzo Fernández te chu Brazil ramah an tangkhang a, Argentine Football Association chuan anmahni hruai tur hian thlawhtheihna hran a tirh a ngai hial.

Spain aṭanga South America pantu Giovani Lo Celso, Julian Alvarez, Rodrigo De Paul leh Nahuel Molina te thlawhtheihna pawh darkar ruk chuanga tih khawtlai a ni a, training ni hmasa ber tura ngaih Thawhṭanni khan team an zawm ve hman lo.

Nimin tlai kha chuan Argentina tana inlan tura kohte hi an ram khawpui Buenos Aires-ah an kim thei tawh a, training pawh an nei thei. Ni danga international break an neih aiin ni khatin training hun a nei tlem ta hret tihna a ni.

Argentina manager Lionel Scaloni chuan, "Leo dinhmun a ṭha, kan hnena a lo kal hma khan match a khel nual a, chungah te chuan harsatna nei loin ṭha tak takin a inlan thei vek. Team tan a pawimawh a, a ṭhiante tan mi ṭangkai a ni leh ang," a ti.

Kum 37 mi Messi hian Argentina tan match 187 aṭangin goal 109 a khung tawh, a goal khung zinga 31 chu World Cup qualifier huangah a ni. Messi hian a hma hun sawi thei lo mah se, tuna a lan dan chuan World Cup 2026 a khel a nih pawhin a mak lo ang.

World Cup leh Copa America nomawi kawl mektu Argentina hian match 10 an khelh aṭangin point 22 an hmu a, ram 10 inel zingah an sang ber - anmahni hnaih bertu Colombia aiin point thumin an hmu sang mek.

Brazil pawh an inlan dawn - Ningani zan dar 2:30 hian Venezuela an lenchilh dawn a, an thiampuipa Neymar tel loin an lan rih a la ngai dawn a, tun hnaiah an insiamṭhat avangin beisei pawh an nei sang ang.

Barcelona tana season duhawm hmang mektu Raphinha an nei a, tlarhma lamah hmun pawimawh a chang ang. Real Madrid duhlai Vinicius Junior pawhin club tan chauh ni lo, an ram tan rintlak a nihzia a lantir a hun ta hle.

South American ram 10 te hi vawi hnih ṭheuh an inkhel kual dawn, chumi hnuah a sang paruk chu World Cup khel turin an tling nghal ang, pasarihna pawhin playoff an la khel thei dawn, world ranking lama an san miau avangin World Cup ticket pawh an nei tam tiin a sawi theih.