Match hmasa berah Sindhu a chak

Kumamoto Masters Japan Super 500 tournament khelh laiah PV Sindhu chuan nimin khan a match hmasa ber a khel a, harsatna lian tham tawk loin a khingpui Busanan Ongbamrungphan a hneh.

India nula Sindhu hian Thailand player hneh turin hun pawh a mamawh rei lo, minute 38 chhungin 21-12, 21-8 in a hneh fel der. Player pahnihte vawi 19 an intawn tawhah Sindhu hi vawi 18 tehmeuh a chak.

Olympic medal vawi hnih la tawh Sindhu hian season a hmang ṭha lo a, kuminah a tawp erawh khar ṭhat a tum - a tan nomawi mai bakah ranking siam tur pawhin champion a pawimawh.

Sindhu a chak lai hian Treesa Jolly leh Gayatri Gopichand te erawh an chak lo. Hmeichhe doubles inelna huangah Indian player pahnih hi Chinese Taipei pair Hsu Yin-Hui leh Lin Jhih Yun te lakah 16-21, 16-21 in an tlawm a ni.