GIG Motors All Mizoram Inter Village: Armed Vengin Ramthar an pet chhuak

GIG Motors All Mizoram Inter Village Football Championship chu nimin khan khelh chhunzawm a ni a, Chite Veng khelmuala inkhel ngaihven hlawhah Armed Veng chuan 1-0 in Ramthar Veng an hneh.

East Bengal defender hlui Lalramchullova enkawl Armed Veng tan Lalrindika Sailo chuan inkhela goal awmchhun a khung a, round of 64-ah a team a hruai thleng.

Chite Venga inkhel hmasa berah Tuivamit chuan 3-2 in Sihphir beiseina an hmeh mihsak a, Ramhlun Sports Complex pawhin 3-2 in Mualkhang an hneh - RSC tan James Remlalnghaka'n goal hnih a khung a, Mualkhang tana Lalhmingmawia goal hnih erawhin awmzia a nei phak lo.

1st Bn MAP Ground, Armed Veng lamah goal a lut hnem. Sairang Jt VC chuan 10-1 ngawtin New West Phaileng an sawp a, Sairang tan Lalrinsanga leh Lalhmingmawia ten hattrick an siam ve ve.

Ramhlun Venglaiin inkhel hmuhnawm takah 4-3 in Ngopa an hneh a, Ngopa hian 2-0, 2-1 leh 3-1 ten hma an hruai hman a, mahse, Ramhlun Venglaiin si phurh sut zo zelin, minute 90-naa K. Roluahpuia goal hmangin an chak daih. Hetihlai hian Sihphir Venghlun chuan 5-0 ngawtin Serchhip Jt VC an sawp bawk.