Champions League - tute nge round of 16 khel dawn?

Tun season-ah Champions League khelh dan phung thlak a ni a, match li an khelh tawh hnuah pawh fans tam takin, "Tu nge tling ang le?" an la ti he haw a, a hrethiam lo tan chuan European football-a club inelna sang ber hi a kalphung hriatthiam a har hle.

Season dangah chuan group tinah team pali awmin, an inkhelh kual vek hnuah a sang pahnihin last 16 an lut mai ṭhin kha a ni a, tunah chuan kalphung a inthlak ta hlawk - team 36 chu group-ah ṭhen hrang loin an awm ho vek!

Team tinin match riat ṭheuh an khel ang a, heng match riatah hian club hran ṭheuh an hmachhawn - match li hi anmahni home-ah an khel a, match li dang hi khualmualah an khel thung. A awmziaah chuan an hneh loh club lakah phuba lakna chance league phase-ah an nei lo tihna a ni.

Club tinin match riat an khelh vek hnuah top 8 chin chu last 16 lut nghal tur an ni - pakuana aṭanga 24-na ten playoff an khel leh ang a, hmun ruak dang pariat an inchuh leh ang.

Sawi leh ang!

Top 8 team-te hian round of 16 an lut nghal a ni ringawt lo a, last 16-ah hian seeded team an ni dawn - 9-na aṭanga 24-na ten playoff hi double leg-in an khel dawn a, hei hi last 16 hmaa Champions League boruak ti 'hot' thei tur a ni.

Hetah pawh hian a sang lama awm tan chance a ṭha lehzel - 9-na aṭanga 16-na te chu seeded an ni dawn a, anni hian 17-na aṭanga 24-na te an hmachhawn dawn. Hei chauh a ni lo a, seeded team-te hian second leg mahni home-ah an khel dawn a, hei ringawt pawh hi a hlu.

25-na hnuai lam team zawng tan beisei tur a awm tawh lo a, Europa League pawh an khel dawn lo - season hmasa thleng kha chuan group tina pathumnate Europa League khel turin an tla thla a, tun season-ah chuan Europa League pawh an khel dawn lo.

Tun dinhmunah top 24 hnuai lama awm club langsar pakhat chiah an awm a, Paris Saint-Germain an ni - French club hian match li khelh tawh aṭangin point li chiah an nei a, Luis Enrique leh a naute ho hi tla thei dinhmunah an ding.

Engzat nge ngai?

Champions League kalphung thar kalpui a nih dawn khan vawi khatmah la tih ngai loh a nih miau avangin, last 16 lut tura team pakhat tana point hmuh zat tur hriatthiam a harsa hle - hei hi Opta chuan zir chiangin, point hmuh zat tura ngaih an tarlang.

Opta chhut dan aṭang chuan top 8 ni turin point 16 hmuh a ngai. Chumi awmzia chu match riat aṭangin vawi nga chak a, vawi khat draw neih a ngai - Opta hian point 16 hmu hi an tling ngei ngei dawn an ti chuang lo a, 98% chance an nei, an ti.

Hetihlai hian knockout playoff khel turin point 10 tal hmuh a ngai dawn - hei pawh Opta chhut dan bawk a ni a, top 24-a awm tur team hian match riat aṭanga vawi thum tal hnehna an chan a, vawi khat draw an neih a ngai tihna a ni.

A tawi zawnga sawi chuan match li bak tlawm a thiang lo. Opta chhut mai ni mah se, an uluk em avangin a rin tlak tura ngaih a ni - point kua hnuai hmu tan CL-ah beisei zui tur a awm dawn lo tihna a ni a, point li lek la neitu PSG tan ngaih ngam a harsa dawn.

Liverpool an sang

Premier League hmahruaitu Liverpool-in Champions League-ah pawh hma an hruai a, match li khelh tawha la chak vek awmchhun an ni. Opta chhut dan aṭanga tehin match li khelh tur la awm aṭanga point li an hlawhchhuah chuan last 16 luhna chance 98.8% an nei.

Ruben Amorim-a'n Manchester United enkawl tura a chhuahsan Sporting Lisbon pawh an dinhmun a ṭha rih viau - point 12 neitu Liverpool hnuai chiahah awmin, point 10 an nei mek a, AS Monaco, Brest leh Inter Milan te nen point 10 vek an nei.

Point 10 nei zingah Inter Milan tih loh chu club lian tia chhal tur an awm lo a, a engemaw zawng tak chuan tun season Champions League hi a ngaihnawm phian - last 16-ah club langsar lo kan hmu nual lo ang tih a sawi theih loh!

Round of 16 'direct' a lut thei chin tur, top 8 chinah hian Barcelona, Borussia Dortmund leh Aston Villa an awm bawk a, point kua ṭheuh an hmu - Champions League hi a ngaihnawm tawlh tawlh dawn niin a lang.