Fritz tan Sinner a thiam hret

ATP Finals 2024 khelh laiah Jannik Sinner chu semifinal lut ngei turin a dinhmun a ṭha ta hle, a group match pahnihnaah Taylor Fritz chu 6-4, 6-4 in a hneh.

Italian tlangval hian world number 1 ni chungin kum tawp a hmang dawn tih a chiang tawh a, hei vang hian nomawi pawh an hlan. Thawhlehni zan khan inrintawkna sang tak nen a inlan a, set hnih an khelh chhung a service a hloh miah lo.

Turin-a inkhelah, seeded pakhatna Sinner hian set pahnihah hian vawi khat ve ve a khingpui service a chhuhsak a, chu chu straight set hmanga chak nan a tawk - ama service a hum vek a ni.

Kum 23 mi Sinner chuan, "Taylor Fritz nen hian kan inhrechiang em em a, tun hma pawhin kan lo intawngin match hautak pawh kan lo khel duh tawh ṭhin, chuvangin tun ṭum pawh kha a awlsam lo hle.

"Min thlawptu an ṭha em em a, chung mite chuan chakna min pe. Kan rama inkhel kan ni bawk a, a boruak a nuamin ram danga inkhelh nen chuan a inang thei lo, ka tan chuan hmun nuam a ni," a ti.

Sinner hian tun season chhungin nomawi pasarih a chawi tawh, match 73 a khelh aṭangin vawi 67 a chak tling ta chiah bawk. Sinner leh Fritz te inkhel hi a hmunah mi 12,000 chuangin an en, an zingah hian football legend Andrea Pirlo pawh a tel.

Ilie Nastase Group-a inkhel dangah Daniil Medvedev chuan Alex de Minaur chu 6-2, 6-4 in a hneh, a match hmasa zawkah Russian tlangval hi chak lo mah se, tunah chuan a thiam pali zinga inhlangkai turin kawng dik a zawh leh ta.

Medvedev hian a match hmasa zawkah Fritz a hneh lo, sawiselna a dawng nasa - De Minaur nen an inkhelh lai pawhin au eltu an awm nual, hnehna a chan hnuah Medvedev hian a beng a hup a, amah sawiseltute chu ngawi turin zaizirin a ti.

Kum 28 mi Medvedev chuan, "Mi ten ka chanchin hi engtin nge an sawi tih hi a pawimawh ber a ni lo a, tennis court-ah eng anga ṭhain nge ka khelh tih hi a pawimawh zawk chu a ni. Tun ṭumah hian min ring ngam lo tute chhanlet nan ka khel ṭha tawk hle niin ka hria," a ti.

ATP Finals 2020 chuan Medvedev hian zanin zanlai hian Sinner a hmachhawn leh ang, a chak a nih chuan semifinal a lut thei dawn a ni. Sinner tan erawh chak ngei ngei a ngai lem lo, set a la hrim hrim a nih chuan semifinal a lut ang.