November 2, Inrinni zan kha Liverpool fan-te tan an duhthusam thlen zan a ni - champion tuma an elpui Arsenal leh Manchester City an tlawm a, anni an chak thung. Arne Slot-a naute hian table chung ber an luah leh ta.

Arsenal-in Newcastle an ngam lo a, City-in rin loh takin Bournemouth an ngam lo bawk. Liverpool erawh Brighton & Hove Albion lakah goal chhuah hmasa ve tho mah se an 'comeback' a, Anfield-ah 2-1 in an chak.

Brighton-in League Cup last 16-a an ngam loh hlim Liverpool an lo mikhual a, phuba lak an châk. Goal pawh Ferdi Kadioglu-a finishing tawih zet hmangin an khung hma a, Premier League top three-te tlawm vek zan a ni dawn emaw kan ti hman.

Mahse, second half-ah thawnthu chu her danglamin a awm a, Cody Gakpo leh Mohamed Salah hmanga chhangletin, Liverpool-in hnehna an chang a, English top flight league-ah anni aia chungnung zawk an awm rih lo.

Hlauhthawnna

Reds-in Amex Stadium-ah Brighton hi 3-2 in an hneh tawh a, an hneh karah Anfield-ah an mikhual zui. Mahse, team pahnihin kha inkhel aṭang khan player 18 ngawt an thlak danglam a, chuvang chuan inkhel ang renga thlir chi a ni lo.

Anfield-ah rin aiin Brighton an tlangnel a, kum 31 mi coach Fabian Hurzeler kaihhruaina hnuaia khel team hian dawih taka goal venhim chauh ngaihtuah loin, club lian zawk Liverpool lakah chak an tum ngam.

Reds fan-te tan thin phutna tur a thleng do a, Alisson hliam vanga si ban nghaktu Caoimhin Kelleher-a chet ṭhat zan ni lo ngat se, Reds tan thawnthu a danglam dawrh thei hial ang.

Brighton hian minute 14-na lekah goal hmahruai an khung a, Danny Welbeck-a siamsak chu Fenerbahce aṭanga an lakluh fullback Ferdi Kadıoglu chuan goal-ah a chantir a, Anfield a reh.

Liverpool chu

Tun hnaia an match neih hnem a lang em ni chu aw, tih turin Liverpool inkhel a nung tawk lo a, first half-a si an phurh hnuah pawh awmze neiin Brighton an nawr thei lo - si phur chungin chawlhlawk an hmang.

Second half-ah Reds inkhel a nung sawt a, goal hmu tur erawhin an nghah rei a la ngai tho. Minute 70-naah Cody Gakpo a inlar a, League Cup-a Brighton laka goal hnih khungtu hi league-ah pawh Brighton hmelma a ni nawn.

Minute 70-naah mual vei lam sir aṭanga Gakpo-a ball cross chu goal-ah a lut a, Liverpool-in si phurh an sut! Uruguayan striker Darwin Nunez chuan Gakpo ball cross hi tauh luh a tum a, mahse, a tawk fuh lo.

Hetihrual hian Nunez-a chet dan hian Brighton tlarhnung leh keeper Bart Verbruggen te ball kal dan tur a chhutsual tir niin a lang a, Anfield-ah Reds-in comeback ngei an tum tih chu goal hmangin an pholang.

A hming Salah

Liverpool chak thu sawi apianga ziah tel ngai a awm a, a hming chu Salah a ni. Egyptian forward hian goal an khung aṭanga minute hnih hnu lawkah hmahruaina goal a khung zui a, Anfield thawm chu ring tak a ni.

Salah goal khung tur hi Curtis Jones siamsak a ni a, kum 32 mi forward hian a ke vei lamin goal chung kil sirah tak a dah - a ball lak dan, chet vel dan leh finishing chu 'a bu ang thlap' a ni a, contract hmang zo mai tur forward hi Reds tan chelh a ngai!

'Egyptian King' hming lem an pek Salah hi a vanneih zan ni se, goal dang pawh khung thei a ni a, mahse, Verbruggen pet khum a tum chu a na lo hret a, a lut ta lo - Liverpool chakna goal khungtu erawh a ni leh ta tho.

Salah hian tun season inelna hrang hrangah match 15 khelin goal kua a khung tling leh der tawh a, assist vawi sarih a nei. Premier League bikah match 10 khelin goal sarih a khung a, assist vawi nga a nei bawk.