La Liga manager an lawm lo

Spanish football-a league sang ber, La Liga coach-te chuan an ramin chhiatna rapthlak tak a tawh laia inkhel kaltlangpui a ni chu an lawm loh thu an sawi a, Spanish football thuneitute na takin an dem.

Valencia chhehvela ruah sur nasa avangin tui a lian a, mi 200 chuangin an nunna an chân phah. Spanish Football Federation (RFEF) chuan Valencia huam chhung leh a hnaih deuha inkhelte chu inkhelh hun a sawn vek a, mahse, hei hi La Liga manager ṭhenkhat chuan tawk an ti lo.

RFEF thutlukna avangin kartawp La Liga inkhel tur zingah Valencia vs Real Madrid leh Villarreal vs Rayo Vallecano te pawh an inkhelh hun sawn a ni a, hetihrual hian Spanish football thuneitute hian inkhelh dang erawh sawn tumna an nei lem lo - Zirtawpni zan aṭang khan inkhel a awm leh der tawh.

Atletico Madrid manager Diego Simeone chuan, "Awmze nei lo mai a ni. Thil thleng hi a rapthlak em em a, mipui tam tak an hnathawh thawmhnaw nen, harsa zawkte ṭanpui duhin an tei suau suau a, chu chuan he ram inlungrualzia a tilang bawk. Keini pawhin puih ve kan duh a ni.

"Vanduaina rapthlak tak tawk mi an awm laiin inkhelh chhunzawm tura beisei kan ni a, kan tih mai a ngai si a ni," a ti a, nizan khan Atletico hian Las Palmas an mikhual a, an result kan hre hman lo.

Barcelona boss Hansi Flick chuan, "Ka thuneihna chu ni se, infiamna zawng zawng ka titawp lailawk rih ang. Valencia mai ni lo, Spain ram pumpui tan chhiatna rapthlak tak a ni," a ti - La Liga hmahruaitu hian nizan khan Espanyol an mikhual.

Inrinni zan khan La Liga match hnih khelh niin, Zirtawpni zan khan match khat khelh a ni a, nizan khan match li a awm a, zaninah match khat khelh a ni ang.