Champion City leh Champion tum Arsenal an chak lo
Arsenal an chak lo a, kalsan fal theihna remchang an neih chu Manchester City pawhin an chhawr ṭangkai thei bik lo - Pep Guardiola naute hi an tlawm ve tho!
Mikel Arteta naute hi Newcastle United mualah 1-0 in an chak lo, goal awmchhun hi Alexander Isak khung a ni, season hmasa an chetsual tawhna hmunah bawk Gunners an chesual nawn leh tihna a ni.
North London club an chak lo tih hresa chungin Man City an inlan zui ve a, champion lai hi AFC Bournemouth mualah 2-1 in an chak lo, tun season EPL match bikah a vawi khat nan an tlawm.
Arsenal chak lo
Season hmasa khan St. James' Park-ah Arsenal an lawm lo hle a, an lawm loh chhan chu an chak loh bakah an goal chhuah danah a ni, tun season chu an goal chhuah danah sawisel tur a awm ta lo, an chak lo leh tho.
Hremna hmang zo William Saliba a lo kir a, tlarhnung laia a dinpui ṭhin Gabriel chu a dam bawk - anni pahnih an inkawp chuan an rinawm tawk tura ngaih a ni, mahse defender ṭha pahnih hian ven hneh loh an nei tlat!
Minute 12-naah mual sir lam aṭanga Anthony Gordon-a siamsak chu Isak hian chiang lutukin a tauh lut. Saliba leh Gabriel ten an veng tawk lo a, EPL golden glove kawltu David Raya tan dan theih a ni bik lo.
Arteta-a'n goal nawr dan phung tihdanglam a tum a, second half-ah a player siksawi kual mah se awmzia a nei phak tawh lo, goal khung tuma an shot zinga pakhat chiah goal zawnah a kal hial a ni.
Gunners manager Mikel Arteta chuan, "Ka khelh dan kha a lungawi thlak loh takzet a, a nihna tak sawi chuan chak loh kha kan phu tawk a ni. Newcastle lam khan an thil tum ang an tihlawhtling thei, keini lam erawhin kan thei ve lo thung," a ti.
Arsenal an khel ṭha lo a, chutihrualin Eddie Howe leh a nauten an hna an tlin bawk. A hunah tak goal an khung a, an remchang hmuh ṭhat an hlah lo - goal an khung hnuah an tlarhnung an remphui ṭha em em bawk, season bul ṭan fuh lo mah se tun hnaiah an harh.
Magpies manager Howe chuan, "Carabao Cup-ah Chelsea kan hneh a, tunah Arsenal kan hneh leh bawk - tun hnaiah nasa takin kan rilru puthmang a danglam a, minute 95 chhung thil dang ngaihtuah miah loin kan khel thei tih a takin kan lantir," tiin a sawi.
City an buai!
Pep Guardiola naute hian season dang ang bawkin goal khung an harsat lo, mahse kum dang angin an tlarhnung a phui lo thung - tun season atana Rodri an chhawr thei tawh lo tur hian nghawng a nei chhunzawm zel a nih pawhin a mak lo ang.
Vitality Stadium-ah pawh Man City tlarhnung a phui lo. Minute kuana lekah Antoine Semenyo-a goal kan hmu, left back Milos Kerkez-a ball pek chu Semenyo hian a ke vei lamin a dang a, rang zeta vir chungin a ke ding lamin a khung - keeper Ederson tan tihngaihna a awm lo.
Hungary international Milos Kerkez a hmuhnawm zui a, mual sirah Kyle Walker hmaah a zam lo, chak taka ball a tlanpui hnuah box laiah cross chhoin Evanilson chuan a lo khung leh keuh, minute 64-naah 2-0 in hma an hruai.
Guardiola naute an talbuai, hun tawp dawn lamah defender Josko Gvardiol-a tauh luh hmangin beiseina an nei thar. Mahse, an vannei zui tawh lo - striker Erling Haaland meuh pawhin a hun ṭha neih a chhawr ṭangkai thei tawh bik lo.
Norway international striker Haaland hian hnai zet aṭanga a tauh chu goal tura ngaih a ni, mahse keeper Mark Travers chuan a lo dansak a, ball per let hi Haaland bawkin changin pet zui nghal mah se Travers bawkin a lo dansak a, point thum an hlawh chhuak.
Man City manager Guardiola chuan, "Bournemouth kha ka lawmpui, ball kang leh leia ball kan inchuhah khan a chungnung zawk an ni thei zel, an goal nawr a nain an rilru a huaisen em em bawk," tiin a sawi a, an khingpui ten chak phu zawka an khelh thu a sawi.
Andoni Iraola enkawl Bournemouth hian Man City hma hian Arsenal an lo hneh tawh bawk a, champion lai leh an elpuite lakah zahngaihna an lantir lo, season tawpah an la thlirkir ang a, nomawi chawi leh chawi loh hriltu pawimawh tak an la ni mai thei.