MPL-ah hmun ruak pakhat a la awm

Mizoram football-a club inelna sang ber Mizoram Premier League 12-ah hmun ruak pakhat a la awm a, vawiin chawhnu dar 2:15 hian Chawnpui FC leh Kanan FC ten hmun ruak pakhat an inchuh dawn - playoff hi double leg-a khelh tur a ni a, November 6, Nilainiah second leg khelh leh a ni dawn.

Kanan FC-in Mizoram Premier League khelh ngei tumin hma an lo la tawh ṭhin a, Mizoram football-a an hming ziah kai an duh - kuminah Chawngthansanga kaihhruaiin ADFA first division nomawi an chawi a, an tan kawng zau taka hawnin a awm.

Mahse, Aizawl district champion hian qualifier-ah Lawngtlai club MLS FC leh Ramhlun North FC inelpuiin, Vanlalpeka enkawl MLS chu goal difference hmang chauhin an tluk lo a, playoff khelh a ngaih phah - Kanan tan a na takzet.

Hetihrual hian coach tawnhriat nei ṭha Chawnga hoin, playoff kaltlangin hun ṭha an nei leh dawn a, tun hun ṭha hi an bawhpelh leh a nih ngat chuan season khat tal an nghah leh a ngai dawn - MPL club neih châk Kanan veng mipuite rilru a na ang.

Theihnghilh loh tur chu Chawnpui hi tawnhriat nei ṭha Lalrindika Hmarin a enkawl ve tho tih hi a ni. MPL nomawi hial lo chawi tawh Chawnpui hian MPL-ah khan pasarihna dinhmun luahin season an khar a, team pariat telnaa a hniam ber dawttu an nih avangin playoff hi an khelh a ṭul - an veng ṭhenawm lakah MPL club an nihna hloh an duh dawn lo a, first leg aṭangin result ṭha neih an tum nghal dawn.

MPL playoff-ah hian away goal rule hman a ni dawn lo a, vawi hnih khelha chak zawkin MPL12 an khel ang - chak zawk an awm loh chuan penalty hmangin MPL khel tur zawn zui a ni ang.