Milan leh Juventus an chak

Serie A team ṭha pahnih Juventus leh AC Milan te chuan tun kar tawp an match pahnihah hnehna an chang ve ve - tun hnaiah result an neih ṭhat tawk loh avangin team pahnih tan chanchin lawmawm a ni ang.

Old Lady hian Udinese lakah 2-0 in hnehna an chang - mualneitu goalkeeper Maduka Okoye chuan anmahni lamah a tilut a, hei bakah hian chawlhlawk hma deuhin Nicolò Savona chuan an goal hnihna a khung bawk.

Tun hnaiah Juventus hian inelna hrang hranga an match hnuhnung parukah ṭum hnih chiah hnehna an chang, league nomawi an beiseina pawh a tlahniam duai hman, tunah erawh beiseina an nei thar ve leh tawh ang.

Juve manager Thiago Motta chuan, "Hnehna kan chang a ni satliah lo a, a tir aṭanga a tawp thleng khan sawisel tur awm mang loin kan khel thei, ka naute chet dan khan lung a tiawi takzet.

"Goal hnih khung tawh kha chuan thil a danglam tawh - Udinese lam khan pawisak nei loin min nawr let tawh a, khatiang hunah kha chuan amhni goal neihsa lo venhim kha kan hna a ni," a ti.

Inkhel dangah AC Milan chuan Tijjani Reijnders-a goal khat tauh luh hmangin Monza chu 1-0 in an hneh ve bawk. Midfielder Reijnders hian Alvaro Morata-a tauh per chu a lo tauh chhawng a, goal awmchhun atan a lut.

Manager Paulo Fonseca-a'n match hmasa lama hrem vanga a chhawr theih loh Theo Hernandez leh Reijnders te a chhawr thei tawh a, damlohna vanga chawl Christian Pulisic a dam tawh bawk, tunah chuan an boruak a kang chho leh tawh tura ngaih a ni.

Milan hian season bul an ṭan fuh lo, league match vawi 10 an khelh aṭangin point 17 an hmu - hmahruaitu Napoli chuan Milan aia match khata khel tlem chungin point 25 an hmu thung.