PSG tan Dembele goal khat a tawk

Paris Saint Germain chuan Inrinni zan khan Lens an mikhual a, inkhelh tir lama Ousmane Dembele-a goal khat hmangin Paris club hi 1-0 in an chak.

Thla hmasa tir lamah khan PSG coach Luis Enrique leh Dembele te hian buaina an nei, Champions League pawh a khelh tir lo hial. Tunah erawh boruak siamṭhain an thawkdun ṭha tih a takin a lang - PSG tan chanchin lawmawm a ni ang.

Ligue 1 champion PSG manager Enrique chuan, "Team zawng zawng hi kan elpui an ni a, a bik takin min hmachhawntute hian chak an duh zual ṭhin, chuvangin kan tan chuan khingpui awlsam a awm thei lo.

"Kar laihawlah Champions League kan khel zui dawn tih kan hria a, chumi hre reng chunga match kan khelh danah hian ka lawm. Inbuatsaihna ṭha tak a ni," a ti. Nilaini zanah Atletico Madrid an mikhual ang.

Goal awmchhun khungtu Dembele chuan, "Kan elpui AS Monaco an chak lo tih hresa chungin match kan khel a, kan chak a nih chuan point ruka kal fal theihna remchang kan nei tih kan hria, chumi kan hmang ṭangkai thei chu a lawmawm," a ti.