Martin hmaah Bagnaia a thleng leh ta; A tawp niah champion tur a chiang dawn

Moto GP champion lai Francesco Bagnaia chuan a nomawi humhim theih dan kawng a zawng zel, nimin chhuna tlan zawk tak Malaysian Grand Prix-ah hnehna changin a elpui Jorge Martin hmaah a thleng.

World champion vawi hnih ni tawh Bagnaia hi Martin aiin second thumin a thleng hmasa zawk, khawvela bike intlansiakna sang leh ngaihhlut hlawh berah hian tun season chhunga a vawi 10 nan hnehna a chang tling ta chiah.

Rider championship table lamah erawh Ducati rider Martin chu a chung berah a la awm chhunzawm, amah hnaih bertu Bagnaia aiin point 24 ngawin hma a la hruai, champion turin inelna hnuhnung berah chesual loa point hlawhchhuah hrim hrim a tawk viau ang.

Bagnaia chuan, "Jorge hi chu elpui hautak tak hi chu a ni chiang hle, na taka min nawr hun hi a hre thei em em a, tihsual pakhat lek pawh nei palh ila chuan min hrem nghal vat mai ang, chutiang boruak kara chak theih chu thil lawmawm a ni," a ti.

Tun ṭum intlansiakah hian kum 26 mi Martin hian Bagnaia aiin point kuain hmu tam zawk ni se la chuan a champion fel tawh ang, mahse Spanish rider hian a duh ang vekin thil a thlen tir ngawt thei bik lo, a tawp niah pawh chetsual loh a ngai dawn.

Martin chuan, "Intlansiak hmuhnawm tak kan chhawp chhuak ṭhin a, inelna nuam leh hautak a ni tel bawk. Theih ni se la chuan a hma thei anga champion chu kan duhthusam vek a ni ang, mipui lam tan erawh a tawp nia chinfel chu thil duhthusam a ni thung ang," a ti.

World champion vawi ruk ni tawh Marc Marquez chuan pathumna a beisei sang hman hle, mahse a chetsual zauh avangin Enea Bastianini tan kawng a hawnsak ta zawk a, a tawpah chuan Marquez hi 12-naah a thleng ta a ni.