Rune hnehtu Zverev

Alexander Zverev-a chuan tun hma lama Paris Masters 1000 champion lo ni tawh Holger Rune a hneh a, final a invaw kai. Nizan khan Ugo Humbert nen nomawi an inchuh zui a, result erawh kan hre hman ta lo.

Inrinni zan semifinal inkhelah Zverev hi Rune lakah 6-3, 7-6(4) in a chak a, inkhel dangah Humbert hian 2018 champion Karen Khachanov chu 6-7(6), 6-4, 6-3 in a hneh bawk a, kum 26 a tlin hnua a vawi khat nan Masters huangah final a lut ve chiah.

Kumin Paris Masters-ah hian champion lai Novak Djokovic a inlan lo a, world number 1 Jannik Sinner chu damlohna vangin a inlan lo bawk a, champion tura rinkai Carlos Alcaraz leh Daniil Medvedev ten beisei an phak lo bawk.

Tennis season a zo hnai a, tun season tawp hmain mipa ranking sang zual pariat inelna ATP Finals an la hmabak. Inelna hi Turin, Italy-ah November 10-17 chhunga khelh tur a ni ang.