Ennawm hmuhnawm tak pawhin tawp hun a nei a, puan zar khar a ṭul ṭhin. Kham lo chungin kan thlah a, "Chuti chu ni zawk se aw..." kan ti a, kan suangtuahnain duhthu kan sam fo ṭhin - mahse, kan thu si lo.
Croatia golden generation tia kan chhal, hmuhnawm ti taka kan thlir ṭhin pawh zawi zawiin an ral riai riai a, World Cup 2026 a thlen leh meuh chuan Croatia thar hlak kan hmu tawhin a rinawm - chu chu a ni, khawvel chu!
Thawhṭanni zan khan Euro 2024-a an match tawp berah Croatia thinlung chu tihkehsawmin a awm. An thiampuipa Luka Modric goal khung chu Italy lakah an chakpui mai dawn emaw an ti a, round of 16 an mitthla hman.
Mahse, hun pek belh minute riatnaah Mattia Zaccagni chuan si phurh sutna goal a khung a, pont thum nei sa Italy an tlang daih! Croatia tan last 16 luh theihna dan la awm mah se, puanthuah lo tel lawk chu a finthlak zawk mai thei.
Inkhel hmuhnawm
Leipzig Stadium-ah team pahnihin chak an mamawh ve ve tih an hria a, an innawr tawn - inkhel a hmuhnawm a, ṭan zawk nei lo tan chuan, "Hei lo liama ennawm hmuhnawm" tih mai tur a ni a, ṭan zawk nei tan erawh thin a phu rang ṭhin khawp ang!
Inkhel ṭantir lamah Croatia lamin inkhel an thunun zawk a, ball an chang tam. Mahse, 3-5-2 formation hmanga rawn inrem Italy-in goal khung an tum ruh a, a rei tulh tulh a, an khel ṭha tulh tulh.
Azzurri hian hmahruaina chance pawh an nei. Mahse, Bologna defender Riccardo Calafiori-a cross chu Mateo Retegui chuan uiawm takin a tauh goal thei lo a, Alessandro Bastoni-a chance neih Croatia keeper Dominik Livaković-a'n a lo dante chu a ṭha takzet.
Italy keeper ṭha Gianluigi Donnarumma aiin Fenerbahçe keeper Livaković-a'n hna a ngah zawk a, AS Roma attacking midfielder Lorenzo Pellegrini-a chance neih ṭhat a dansakte chu pui tak a ni.
A na asin!
Croatia-in an duh angin goal an nawr thei lo a, coach Zlatko Dalić-a'n goal khung turin Ante Budimir a luhtir. Croatia goal nawr a na sawt a, minute 52-naah Luka Modric-a team hian penalty an hlawh chhuak.
Andrej Kramarić-a 'shot' chu Italy midfielder Davide Frattesi chuan a kutin a khawih fuh a, penalty a chawi - Modric a pen chhuak a, a khung lo! Donnarumma-a'n Real Madrid midfielder petna tur lam hi a ring dik tlat.
Mahse, Modric-a'n a tihsual siamṭha loa khelmual chhuahsan a tum lo. Minute thum hnu lawkah ṭha zetin Croatia tan a khung - Dalic-a naute hian nawr zui loin, tlarhnung lamah bet thlap se, an goal an humhim mai tur a ni a, an nawr chhunzawm.
Minute 98-na a ni a, referee-in hun tawp rikna ham a tum tawh - hetihlai tak hian Calafiori chuan hmun awl hmuin ball a pe lut a, he ball chang fuhtu Zaccagni chuan ṭha zetin goal-ah a chantir. Lawmin Italy an lam a, Croatia an tliak hnawp thung!
