Semifinal-ah India leh Afghanistan; Australia an tla

T20 Cricket World Cup-ah India-in Super 8-ah khingpuite hneh vekin semifinal an lut. Thawhṭanni zan khan Rohit Sharma-a'n ball 41-ah 92 runs a siam a, Men in Blue-in Australia 24 runs-in an hneh. Aussies hian beiseina tlem la nei mah se, nimin zing khan Afghanistan-in Bangladesh an hneh avangin Mitchell Marsh leh a hote beiseina a tawp.

Afghanistan erawhin mellung thar an phun a, an ram chanchina World Cup-a semifinal an thlen hmasak ber a ni. June 27, Ningani hian semifinal khelh a ni dawn a, zing dar 6:00-ah Afghanistan hian South Africa an hmachhawn dawn. Zan dar 8:00-ah India leh England te an inkhel zui ang.

A hunah Rohit

India-in World Cup-ah Australia an ngam ṭhin lo a, a bik takin semifinal leh final boruak sangah a dawih zawkah an ṭang leh ṭhin. Men in Blue hian tun ṭumah hian Australia hneh lo pawh ni se semifinal luh theih dan la awm tho a, chutihrualin Aussies tlak nan an chak a pawimawh hle.

Rohit Sharma leh Virat Kohli ten bul an ṭan a, Josh Hazlewood-a'n over hnihnaah Kohli a vawm hlum a, India captain hlui hian run pawh a la siam hman lo. Rishabh Pant pawhin 15 runs bak a siam lo mah se Rohit erawh a ding khawng tlat.

India captain Rohit hian ball 41 aṭangin 91 runs a siam a; Suryakumar Yadav (31), Shivam Dube (28) leh Hardik Pandya (27*) ten an rawn thlawp ṭha bawk nen over 20-ah 205/5 an siam a, chak turin an dinhmun ṭha. Australia-in target harsa hi tlin phak ngei tumin huaisen takin bul an ṭan a, Travis Head-a'n ball 43 aṭangin 76 runs a siam.

Aussies-in over 15 zawhah 141 runs an siam a, wicket li chauh an la hloh avangin chak turin beiseina an la chhi nung ve zel. Mahse, over 17-naa Jasprit Bumrah-a'n Travis Head a vawm hlum avangin Aussies tan beisei a chau ṭan a, Arshdeep Sing-a'n over 18-naah Matthew Wade (2) leh Tim David (15) te vawm hlum ve leh bawk. Aussies hian over 20-ah 181/7 runs an siam a, match pawimawh takah India 24 runs-in an chak.

A tawpah Afghan

India-in Afghanistan kawng an sialsak a, mah se Rashid Khan-a hote hi Bangladesh hmaah an talbuai hle. Opener ṭha mi Rahmanullah Gurbaz-a'n (43 runs) siam mah se thlawptu ṭha a nei tawh a, over 20-ah 115/5 runs chauh an tlin a, chak tur chuan bowler-te an chet ṭhat a ṭul hle.

Bangladesh pawhin semifinal beiseina an la nei a, chutihrualin NRR a hniam deuh avangin beisei a sang tawh lo. Chutirhualin Bangladesh hi an chak hrim hrim chuan Aussies-in India hnung an zui dawn a, Afghanistan chak ngei a ngai thung.

Ruahsur vangin inkhel a khaihlak zeuh zeuh a, over 20 tur chu over 19-a tih tlem niin chak turin 114 runs siam a ngai. Opener Liton Das-a'n Australia beiseina siamsakin ball 49 aṭangin 54 runs a siam a, chak turin an dinhmun a ṭha. Mahse, Afghanistan captain Rashid Khan (23/4) leh Naveen ul-Haq (26/4) ten wicket li ve ve an la a, over 17.5-ah Bangladesh an thi fai vek a, 105 runs chauh an siam hman avangin Afghanistan 8 runs-in an chak.

Ball sarih ngawt vawm tur a la awm a, Bangladesh tan chak tura run kua chauh siam a ngaih tawh avangin Afghanistan an vannei a, Australia an tlak phah bawk. Captain Rashid Khan chuan, "Thilmak a ni. Kan ram lamah chuan mi zawng zawng an hliam a, min lawmpui em em bawk. Keini tan chuan semifinal thlen hi mumang ang a ni," tiin a sawi.