Everton-in Harrison an hawh leh ta

Premier League club Everton chuan Leeds United aṭanga loan-a an hawh mek, winger Jack Harrison chu season khat dang loan-in an hawh leh dawn a, hetihlai hian an striker Dominic Calvert-Lewin chu an hralh rih dawn lo niin a lang bawk.

Kum 27 mi Harrison hian season hmasa kha Goodison Park-ah hian loan-a khelin, match 36-ah goal li a khung a, assist vawi thum a nei bawk. English winger chuan, "Everton-a ka lo kir thei hi ka lawm takzet. Club ropui tak a ni a, player khelhpui nuam tak tak an awm bawk - pre-season training-a bul kan ṭan ho leh thei hi ka lawm hle," a ti.

Hetihlai hian Newcastle United chuan Toffees striker Dominic Calvert-Lewin lakluh an tumna chu an chawlhsan a, Everton-in a man atana pound maktaduai 40 an chhiar chu Magpies hian a to lutuk hretah an ngai.

English striker Calvert-Lewin hian Everton-ah thla 12 bak hun a nei tawh lo a, thla hmasa lawk khan Merseyside club nen hian contract thar chungchangah an indawr. Kum 2016 khan Sheffield United aṭangin Toffees hi £1.5mtd-in a zawm a, match 248-ah goal 68 khungin, season hmasa khan match 39-ah goal riat a khung.

Magpies-in Calvert-Lewin an lakluh dawn tak lohah chuan, Everton nena sawizawm, Newcastle winger Yankuba Minteh chuan Everton a zawm dawn lo. Gambia international hian French club Lyon a zawm a rinawm zawk mah.

Kum 19 mi winger hian season hmasa kha Eredivisie-ah loan-in a khel a, Liverpool boss thar Arne Slot hnuaiah match 37 khelin goal 11 a khung.