Marseille coach thar tur Roberto de Zerbi
Ligue 1 club Marseille chuan coach thar atan Roberto de Zerbi an la lut dawn a, Brighton & Hove Albion coach hlui nen hian a thu phungin inremna an nei tawh - he thuziak i chhiar meuh chuan an inrem tawh hial mai thei.
De Zerbi hian season hnih chhung Brighton a enkawl hnuah, season hman zawh takah khan a chhuahsan a, Premier League-a an khelh dan hmuhnawm tak avangin European club lian tak tak nen sawi zawm a ni fo.
Mahse, rin loh takin France lam a hawi a, Marseille a enkawl dawn. Season hman zawh tak ruala football chawlhsantu Jean-Louis Gasset a thlak dawn a, a lakah beiseina a sang ang.
Marseille chuan, "Italian coach De Zerbi leh a coaching staff-te kan hnena an awm thuai theih nan theihtawp kan chhuah a ni," an ti a, rei lotêah official taka lawmluh theih an inbeisei.
Kum 45 mi coach hian September 2022 khan Brighton a zawm a, Premier League club hi a season hmasa berah league-ah parukna a nihpui - top flight league-a an thlen san ber a ni a, an club chanchina a vawi khat nan European football a hruai thleng bawk.
Season hman zawh takah khan league-ah 11-na nihpuiin, Europa League last 16 a hruai thleng a, season zawh hnua inhriatthiam tawnnain an inṭhen.
De Zerbi hian Italian club tenau Darfo Boario aṭanga a coaching career zawh ṭanin, club tenau dang Foggia a enkawl leh hnuah, September 2016 khan Serie A club Palermo a enkawl ṭan a, Italian top flight league-ah hian Benevento leh Sassuolo a enkawl zui leh bawk.
May 2021 khan Ukrainian club lar Shakhtar Donetsk a enkawl zui a, Ukrainian Super Cup nen season bul ṭanin, league lamah pawh a chet ṭhatpui viau a, mahse, Russia-in Ukraine a run avangin a chhuahsan zui - hetihlai hian league-ah hmahruaitu an ni.
De Zerbi thlak tur Gasset hian February khan Gennaro Gattuso thlakin Marseille hi a enkawl ṭan a, Montpellier leh Bordeaux boss hlui hi coach lailawk atan bak ruat a ni lo hrim hrim. Ligue 1-ah pariatna niin season an khar a, kum 2016 hnua league-a an chet chhiat ber an tawng - De Zerbi hoin indinthar an tum e.