Goal khung thei lo Brazil
Brazil chuan an khingpui Costa Rica lakah kawng tinrengin inkhel an thunun a, goal khung theihna remchang pawh an insiam hnem mawlh mawlh hle - mahse a pawimawh ber goal an khung lo a, ram pahnih te 0-0 in an inhnehtawk.
Nimin zing SoFi Stadium-a inkhelah Brazil hi rinkai zawk sa an ni, tlarhma lamah Vinicius Junior, Rodrygo leh Raphinha ten bul an ṭan a, an hnung chiahah Lucas Paqueta a awm bawk a ni.
Real Madrid forward Rodrygo-a'n goal remchang hmu hmasain box chhung aṭangin goal ban hrulah a pet chhuak a, defender ṭha Marquinhos chuan tauh lut mah se video assistant referee (VAR) hman a nih hnuah offside vangin an hnawlsak.
West Ham midfielder Paqueta a hmuhnawm, box pawn aṭangin kawh zeta a hlap phei chu goalkeeper Patrick Sequeira chuan zuan phak lo mah se goal ban a per hlauh a, an him chhunzawm hram hram zel.
La Liga leh Champions League nomawi chawitu Vinicius Junior pawh a che fuh thei bik lo, Spanish club tan goal khung nuam tiin hriam viau mah se Brazil tan chuan tun hma lama goal thum a neih tawhsa bak a la belhchhah thei lo.
Brazil hian hliam vangin Neymar an chhawr thei lo, ram tan match 128 aṭanga goal 79 khungtu hian inkhelh hmain an team a tlawh a, a hmunah inkhel a en bawk - an ramin goal khung an harsat lai hian Brazil tana goal khung tam ber hi thlalaktu lamin an tinzawn zing malh malh hle a ni.
Brazil coach Dorival Junior chuan Endrick tan khelhna hmun a siamsak leh, rawlthar duhawm hian minute 71-naah Vinicius Junior rawn thlak mah se goal erawh a keng tel rih bik lo. Vini hi ram tan a inlan hnuhnung 11-ah vawi khat chiah a khel tluan, a dang 10-ah te chuan an thlak vek.
A hmuna inkhel entu Neymar chuan, "Khelmual chhunga Brazil tana inlante hi chuan theihtawp kan chhuah vek ṭhin a, ram tan kan theihna zawng zawng kan hlan ṭhin. Fans lam aṭangin duhkhawp lohna leh sawiselna a awm ṭhin pawh hi ka hrethiam tho, dem tur an ni bik lo ang.
"Chutihrualin, khelmual chhungah hian thil tih harsa a awm chang a awm ve bawk. Duhthusama kan khel lo a nih pawhin nasa lehzual zawka training neih a, a hma aia ṭha zawka khel tura beih hi Brazilian player-te tih ṭhin dan a ni," tiin a sawi.