Colombia tan Rodriguez

James Rodriguez khan a thiam a la theihnghilh lo, an ram Colombia tan chakna hnar pawimawh a la ni reng - nimin zing pawh khan an ram hi Paraguay lakah 2-1 in a chakpui a ni.

NRG Stadium-a inkhelah Colombia hian chawlhlawk hmain goal hnih an khung. Daniel Munoz leh Jefferson Lerma ten goal khat ve ve an khung a, an pahnih hian Real Madrid midfielder hlui Rodriguez siamsak a ni.

Paraguay lamin second half-ah Brighton winger Julio Enciso hmangin goal khat an sut ṭhen a, goal dang erawh a lut zui tawh lo. Los Cafeteros (Colombia sawina) hian anmahni goal venghim zui tawhin point thum an hlawh chhuak.

Colombia coach Nestor Lorenzo chuan, "Paraguay hi team ṭha leh huaisen, beidawng loa khingpuite bei ṭhin an ni tih kan hria, anni hmachhawn hi chu engtik lai mahin a awlsam ngai lo.

"Inkhel hun rei zawk kan thunun thei a, kan duh leh beisei ang thlapin la khel chhuak thei rih lo mah ila chak phu zawk chu kan niah ka ngai, point thumah hian kan lawm," tiin a naute khelh danah a lawm tih a sawi.

Colombia hian James bakah Luis Díaz an nei. Liverpool forward chungchang sawiin Lorenzo chuan, "James a khel ṭha, fak tur pawh a ni. Diaz pawh khan fak a phu, a bik takin player mal inhmachhawnah khan a hlauhawm thei hle a, hmuhnawm ti takin kan lo thlir mai a ni," a ti.

Ram pahnih hian Zirtawpniah an match pahnihna an khel zui leh ang. Colombia hian Glendale, Arizona-ah Costa Rica an tum dawn a, chak lo Paraguay hian Las Vegas lamah Brazil an hmachhawn thung ang.