Albania ngamtu Spain tan 100%

Euro 2024-ah Spain an la tlawm lo - Luis de la Fuente naute hian group stage-a an match hnuhnung berah Albania chu 1-0 in an hneh a, 100% record nei chungin Euro round of 16 an lut a, champion tura rin hlawh pawla mi an ni zel.

Barcelona forward Ferran Torres chuan minute 13-naah inkhela goal awmchhun a khung a, Dani Olmo siamsak a ni. Hun tawp thlengin goal dang a lut tawh lo a, Spain tan point thum hmuh nan a tawk.

Spain boss De la Fuente-a'n round of 16 an luh chian tawh avangin, Albania laka an game hi chuti takin a dah pawimawh hran lo a, player 10 ngawt starting XI-ah a thlak danglam - second half-ah substitution a siam nual bawk a, keeper Álex Remiro tih loh chu Spain squad-a player-ten Euro 2024-ah minutes an nei vek tawh.

Tun Euro-a team hmuhnawm ber pawl Spain hian awlsam tak erawhin hnehna an chang bik lo - Albania hian vawi 10 zet shot neiin, goal khung theihna chance an nei a, an hun ṭha neih an chhawr thei lo.

Albania tan Kristjan Asllani chuan yard 25 vela hla aṭangin chance duhawm a nei a, mahse, season hman zawh taka Arsenal-a loan-a khel goalkeeper David Raya chuan ṭha zetin a dansak a, Brentford keeper hian Fulham striker Armando Broja khung ngei tura lang a dansak bawk.

Chutihrual chuan Spain B team ang hiala chhal theih Spain hi chance nei tam zawk erawh an la ni tho a, Real Sociedad midfielder Mikel Merino, Real Madrid striker Joselu leh RB Leipzig forward Olmo ten goal khungna chance an nei vek a, an chhawr thei bik lo.

La Roja result avang hian point li neitu England, France leh Netherlands ten round of 16 an lut ve nghal bawk a, Albania laka Spain result hian ram langsar pathum hi an match tawp berah hahdamin a khelhtir ang.