A tawp thlengin Mercedes tan - Hamilton

Lewis Hamilton chuan a team awm mekna Mercedes tan a contract neih chu a ṭha thei ang bera hman zawh a tum tih a sawi a, season tharah erawh team thar a nei dawn tih a sawi lang tel bawk.

Britain tlangval Hamilton hian season 12 chhung chu Mercedes car a khalh tawh, hlawhtlinna tam tak changin tun season tawp rual hian an inremna hi a zo ang, kum tharah chuan an elpui Ferrari a zawm dawn a ni.

Red Bull leh an driver ṭha Max Verstappen ten vanglai an hmang mek a, hei vang hian world champion vawi sarih ni tawh hian tun hnaiah result ṭha a nei hleithei lo, tun season chhungin vawi khat chiah pathumna chinah a la thleng.

Spanish Grand Prix-a pathumna Hamilton chuan, "Mercedes hi ka ngaina a, an tana a ṭha thei anga bera hna thawh hi ka tih tur a ni. Kan ṭhat ber lai ni lo mah se midang elphak tura beih pui hi ka hna a ni bawk.

"Team tan theihtawp ka chhuah zel dawn, season tharah team thar nei dawn mah ila he hmuna ka awm chhung chuan thil dang ngaihtuah a remchang lo," tiin Mercedes tan a tawp thlenga beih a tum tih a sawi.

Car intlansiakna sang berah hian season 18 chhung chu a zawnin pathumna chinah a thleng ziah a, a zawna podium lawn rei thei record chelhtu a ni hial - season tharah pawh belhchhah ngei a tum ang.

Chutihrualin a chak ber nih erawh a harsa tawh, kum 2021 Saudi Arabian Grand Prix hnuah chak ni hmel a la hmu leh lo, season tharah Ferrari car a khalh hunah pawh a awlsam kher lo mai thei bawk.