Euro 2024 Last 16-a team inrem dan tur

Euro 2024-ah team 24 an tel a, team 16-in knockout an lut dawn a, team pariat chiah an tla dawn tihna a ni. Last 16 fixtures awm dan tur hi a kalphung a dang hret avangin a hriat thiam loh theih.

Team 24 hi group parukah pali zelin ṭhendarh an ni a, group tin aṭangin a sang pahnih ṭheuhin last 16 an lut dawn. Hmunruak pali a la awm a, group tina pathumna aṭangin a ti ṭha paliin an hnawh khat ang.

UEFA chuan team inhmachhawn theih dan tur awmze nei takin a rem lawk vek a, group pali tlingte a zirin last 16 fixtures rem dan tur a danglam zel. Tun dinhmuna (nizan inkhel result a tel lo) pathumna inrem dan aṭangin han sawifiah ta ila.

Nizan inkhel tiam lo a, pathumna ti ṭha palite chu Austria (group D), Slovakia (group E), Hungary (group A) leh Slovenia (group C) te an ni. Chumi awmzia chu group A, C, D, E aṭangin an tling tihna a ni a, table-ah ACDE awmna en tur a ni ang.

Tichuan, group B pakhatna Spain-in group E pathumna Slovakia (?) an hmachhawn dawn tihna a ni a; group C pakhatnain (England?) group D pathumna (Austria?), group E pakhatnain group C pathumna (Slovenia?) leh group F pakhatna Portugal-in group A pathumna Hungary an hmachhawn ang.

Group stage a la zawh loh avangin group tin aṭanga pathumna tur a la chiang lo a; a nihna takah chuan group B, C, E leh F pakhatna te hmachhawn tur hi a la hriat theih loh. Tun ṭuma mi chu fixtures awm theih dan sawifiahna a ni.