Portugal tan indahṭhat hun

Zanin dar 12:30 hian Portugal chuan Georgia an hmachhawn dawn - Cristiano Ronaldo awmna ram hian Euro 2024 khelh laiah last 16 an lut chiang tawh a, player ṭha ṭhenkhat an hahchawlhtir a nih pawhin a mak lo ang.

Roberto Martinez-a naute hian Czech Republic leh Turkey an hneh tawh a, vawi hnih an chak hnuah Martinez chuan, "Kan squad-ah hian player ṭha tak tak an tam a, vawi khatah inlan vek theih erawh a ni lo.

"Kan match hmabakah hian mi ṭhenkhat tan inlanna hun a awm thei ang," tiin a lo sawi zauh tawh a, inelna hautak zawk hmachhawn chhunzawm tur an la nih avangin a ṭha khek hun chu a ni.

Portugal hian Euro vawi kua khelh tawhah knockout stage an la lut vek a, record an nei ṭha hle. Georgia erawhin major tournament pangngaiah chak ni hmel an la hmu miah lo, an tan Portugal hneh thut chu a harsa in a rinawm.

Martinez-a'n a player ṭha a hahchawlhtir a nih pawhin Ronaldo chu inlan tura beisei a ni. Portugal captain hi mipui hmuh châk a ni a, an match hmasa lamah pawh amah vangin khelmualah mi panga ngawt an tlan lut.

Portugal coach Martinez chuan khelmual sir aṭanga mipui tlan lut an tam chu pawi a tih thu a sawi tawh a, venhimna lam khauh leh zual zawk awm thei se a duh tih a sawi bawk. Zaninah Ronaldo thlalakpui tum an awm leh a nih chuan venghingtu ṭha zawk an paltlang theih a ṭul tawh ang.