Murray-a'n thutlukna la siam lo

Andy Murray chuan Wimbledon 2024 chungchangah thutlukna a la siam fel lo, vawi hnih a champoin tawhna hmunah hian a inlan ngei dawn em, tih a la sawi thei lo tihna a ni.

Queen’s Club Championship-ah Murray hi a inlan a, a khingpui Jordan Thompson lakah 4-1 in a hnufual laiin hliam vangin a khel zui thei lo a, tun thlengin a la inkhel leh rih lo.

Mipa tennis thuneitu sang Association of Tennis Professionals (ATP) chuan X (Twitter) lamah Murray hi Wimbledon aṭangin a inhnukdawk angin an ziak zauh a, mahse a hnuah an thuziak hi an paihthla leh rih a ni.

Murray chungchang zawhna chhangin Britain Davis Cup captain Leon Smith chuan, "Ka hriat danah chuan thutlukna a la siam lo a, a hliam zai niin a chawl hahdam mek a, a inkhelh leh theih thuai chu kan beisei thung.

"Andy hi dam leh thuai turin kan duhsak a, vawi hnih a champion tawhna Wimbledon hi khel ngei se tih hi kan duhthusam a ni, a inlan thei lo a nih chuan grass court inelna lian tan chânna nasa tak a ni ang," a ti.

Tennis tournament zinga upa ber nia sawi ṭhin Wimbledon hi July thlatir aṭangin All England Club-ah an khel leh dawn. Rafael Nadal a inlan thei dawn lo a, ani bakah hian Novak Djokovic dinhmun a chiang lo bawk.