Football khawvela a vanglai hmang mektu Erling Haaland tan chuai lam pan mek Lionel Messi a la sang lutuk hret - Thawhṭanni zan khan FIFA Best Awards sem a ni a, Manchester City tana treble nomawi chawitu Haaland leh Paris St-Germain forward Kylian Mbappe khumin, Messi-a'n award a dawng leh ta.

Hetihlai hian Champions League, Premier League leh FA Cup-a Manchester City champion puitu coach Pep Guardiola chu coach ṭha ber atan thlan a ni a, City goalkeeper Ederson chu keeper ṭha ber atan thlan a ni bawk.

World Cup 2022-a Argentina champion puitu Messi hian Ballon d'Or a lo dawng tawh bawk a, season duhawm tak hmangtu Haaland tan chuan Argentine forward hi a ropui belhchhahna tur daltu a ni chiang hle.

Kum 2016 aṭang khan FIFA Best awards hi sem ṭan a ni a, Messi hian a vawi thum nan player ṭha ber chawimawina a dawng - kum 2019 leh 2022 khan a lo dawng tawh bawk a, vawi thum he award dawng thei hmasa ber a ni a, a award dawn hnuhnung berah hian a hmunah a kal thei lo thung.

Messi sulhnu

Award hi December 19, 2022 - August 20, 2023 inkara an chet dan aṭanga sem a ni a, Messi-a'n World Cup nomawi chawi mah se chhiar tel a ni lo, tihna a ni. Hetih chhung hian Messi-a'n club pahnih tan a khel hman a, Paris St-Germain leh Inter Miami a ni.

Messi hian PSG tan hemi inkarah hian goal 18 a khung hman a, Ligue 1-ah PSG chu nomawi a chawipui. June thla khan Paris khawpui chhuahsanin, Miami lam a hawi a, David Beckham-a club Inter Miami a zawm.

Club indinthar ve chauh Miami hi Leagues Cup-ah champion puiin, match sarihah goal 10 a khung a, Messi vang liau liauin an champion tiin a sawi theih - khawvela footballer ṭha ber award dawn nan erawh inelna hi a sang tawk em, tih chu zawhna awm thei a ni.

International football-ah chuan, December 19, 2022 - August 20, 2023 inkar hian CONMEBOL 2026 FIFA World Cup qualification-ah Argentina chu Messi hian hma a hruaipui a, match ruk an khelhah vawi nga chakin, vawi khat chiah an tlawm.

Mahse Haaland hi...

Haaland-a'n season hmasaah City chu Champions League, Premier League leh FA Cup champion a nihpui a, Premier League-ah season khata goal khung hnem ber record siamin, goal 36 a khung a, inelna hrang hrangah goal 52 ngawt a khung bawk.

Norwegian striker hian December 19, 2022 - August 20, 2023 inkarah goal 30 a khung a, "Hei bak enge tihtheih awm chuang?" tih tur khawpin season duhawm a hmang a, mahse, Messi a awm miau a, kut ruakin Haaland a haw rih.

Haaland hian season hmasa khan Premier League Player of the Season, Premier League Young Player of the Season, FWA Footballer of the Year leh PFA Players' Player of the Year award te a dawng.

Kum 25 mi Mbappe pawh sawi hmaih a thiang lo. Pathumna dinhmuh luahtu French forward hian December 19, 2022 - August 20, 2023 inkarah PSG tan goal 18 a khung a, season hmasa khan Ligue 1-ah goal 29 khungin, a zawna season nga nan Golden Boot a dawng a, Ligue 1 Player of the Year a ni bawk.

Captain lungdumtu

FIFA Best Awards hi mawlmang taka sem a ni ngawt lo - national team manager leh captain, ram tin aiawh journalist leh fan (FIFA website-ah vote a thlak theih) ten vote an thlak a, category tin hian 25% hlutna an nei vek.

Messi leh Haaland hian point 48 ve ve an hmu a, Mbappe chuan point 35 a nei. Messi leh Haaland hi an point hmuh zat inang mah se, national team captain zingah pakhatnaa Messi dahtu an tam zawk avangin Messi hian award hi a hum haw.

Pakhatnaa Messi dahtu langsar zingah Harry Kane, Mbappe, Mohamed Salah, Andy Robertson, Luka Modric, Kalidou Koulibaly leh Robert Lewandowski an tel a, India captain Sunil Chhetri-a top three-ah Messi a tel lo - pakhatnaah Erling Haaland dahin, Rodri leh Victor Osimhen ten an zui.

India coach Igor Stimac pawhin Messi a thlang tel lo a, pakhatnaah Rodri dahin, Julian Alvarez leh Kevin De Bruyne te a dawttir. Ilkay Gundogan leh Casemiro ten pakhatnaah Haaland an dah a, Messi ngei pawh hian Haaland a thlang a, Mbappé leh Julián Álvarez te Norwegian striker hnuaiah a dah bawk.