Australian Open-ah Nagal a chak!

India tennis chuan nimin khan chanchin lawmawm bik a nei, inelna lian Grand Slam pali zinga pakhat Australian Open khelh laiah Sumit Nagal chuan hnehna changin second round a inhlangkai.

Australian Open-ah hian Indian player ten chak ni hmel an hmuh lohna a rei tawh, kum 35 hnuah Nagal a rawn chak ve leh ta chiah. Nagal hian world number 27 Alexander Bublik a hneh.

Court 6, Melbourne Park-a inkhelah Nagal hi rinkai lo zawk a ni, qualifying paltlang chunga inelna hmachhawn phak ve chauh ni mah se, a khingpui seeded 31-na ni phak hi darkar hnih leh minute 38 chhungin 6-4, 6-2, 7-6(5) in a hneh a ni.

Tun hmain Nagal hian Australian Open hi a lo khel ve tawh, kum 2021 khan inlanin a match hmasa berah Ricardas Berankis ngam loin a zinkawng a tawp nghal, tunah erawh second round a thleng - amah leh India tennis tan chanchin lawmawm a tling.

India tlangval zingah kum 1989 daih tawh khan Ramesh Krishnan chuan Australian Open-ah hian, khatih laia world number 1 leh champion lai ni bawk Mats Wilander a lo hneh tawh, a hnung zui thei an awm lo rei hle - tunah chuan Nagal hming a rawn lang leh ta chiah a ni.

World number 137 Nagal hian US Open 2020 kha a lo khel tawh bawk a, New York khawpuia a inlan khan India tlangval zingah Somdev Devvarman hnua Grand Slam main draw khel leh thei hmasa a lo ni tawh bawk.

Mipa singles inkhel dangah Casper Ruud chuan Albert Ramos-Vinolas chu 6-1, 6-3, 6-1 in a hneh a, seeded 11-na Ruud hian a match lehpekah chuan tualchhung player Max Purcell a hmachhawn leh ang.