Feb 2 aṭangin I League; Feb 10-ah Aizawl FC

I League fixtures tihchhuah a ni a, February 2, Zirtawpni aṭangin inelna ṭan leh a ni dawn. Aizawl FC erawh round 12-ah an inlan dawn a; February 10, Inrinni aṭangin an khel ṭan ang. Mizo club hian RG Stadium-ah Mohammedan SC an mikhual dawn a, zan dar 7:00-a inkhel tur hi inkhel hmuhnawm bik tura ngaih a ni.

Aizawl FC hian Mizo coach B. Malsawmzuala hnuaiah result ṭha tak an nei a, match 11-ah point 19 hmuin a sang pali zingah an tel. An chunga awm Sreenidi Deccan leh Real Kashmir an phak lohna pawh point khat chauh a ni. Chutihrualin Mohammedan SC erawh an che ṭha fal a, match 11 aṭangin point 27 an hmu tawh thung.

Mizo club hian season ṭha tak hman an duh a, January transfer-ah an inthuam ṭha. Aizawl FC hian Polish midfielder Rafal Zaborowski an lakluh hnuah Iranian midfielder Amir Memari an la lut leh tawh. Kum 30 mi Memari hian training a zawm tawh a, tlarhma lamah a laia khel ṭhin niin mual sir lam aṭanga nawrtu atan pawh hman theih a ni.

I League club enkawl tur hian A Licence coach a ngai a, coach hna chelh lailawktu Sawmtea'n result ṭha tak nei mah se AFC B Licence chauh a la neih avangin Mizo club hian coach thar an la dawn. Aizawl FC hian an coach lak tur hi la tichiang lo mah se European coach nia hriat a ni a, January thla hian training a zawm hman ang.

I League khelh lai hian veng/khua inelna LPS Cup khelh a ni dawn a, I League khel player-te hi an veng/khua tan chuan awhawm tak vek an ni ang. Amaherawhchu Aizawl FC hian I League squad-a chang pha player chu LPS Cup khelh an remti dawn lo. Club sporting director Hmingthansanga chuan, "I League-ah result ṭha nei tura insawrbing kan duh a, chu bakah chuan player-te hian football hi an eizawnna a ni tih an hriat a ṭul bawk. I League ni lo, inelna dang an hmachhawn a rem dawn lo," tiin Vanglaini a hrilh.