Champion lai Senegal an chak nghal

Africa Cup of Nations 2023 khelh laiah Thawhṭanni zan khan Senegal an inlan a, champion lai ram hian an group match hmasa ber atan team nem zawk Gambia chu 3-0 in an sawp.

Teranga Lions (Senegal sawina) lamin bul an ṭan fuh hle, minute lina lekah Pape Gueye-a'n goal a khung nghal - a siamsaktu chu tun hnaia nupui nei hlim Sadio Mane a ni.

Chawlhlawk hma deuhin Cardiff City midfielder Ebou Adams chu hnawhchhuah a ni, goal an phurh bakah player an kim tak loh avangin Gambia tan thawh leh beiseina a thamral nghal tluka ngaih a ni hial.

Second half-ah player tam zawk Senegal lamin nuamti takin an khel thei a, midfielder Lamine Camara chuan goal hnih khung belhin an ram chu nuamsa takin a chakpui a, an match hnuhnung pangaah goal an chhuah ta lo bawk.

Group C inkhel dangah Cameroon leh Guinea te 1-1 in an lo inhnehtawk a, point thum hmu bik Senegal hian group hma hruaiin knockout stage lut turin an dinhmun an siamṭha nghal hle.

Senegal hian an group match pahnihna atan January 19, Zirtawpni zanah Cameroon an hmachhawn zui dawn a, Guinea leh Gambia te an intum zui ve leh thung bawk dawn a ni.

Thawhṭanni zan khan Group D inkhel pakhat awm bawkin, Algeria leh Angola te chu 1-1 in an inhnehtawk. Nizan khan Burkina Faso leh Mauritania te inlan zui ve lehin result erawh kan hre hman lo.