Khelo India Youth Games Tamil Nadu 2024: Hockey, Boxing leh Judo aiawhten Chennai an pan

Mizoramin Khelo India Youth Games Tamil Nadu 2024-ah infiamna pasarihah infiammi 45 an tir dawn a, inelna hi January 19-31, 2024 chhung hian khawpui pali Chennai, Coimbatore, Madurai leh Trichy-ah te khelh a ni ang.

January 14, Pathianni khan Mizoram aiawha hockey, boxing leh judo bakah basektball khel turten inelna hmun panin Aizawl an chhuahsan. January 19, Zirtawpni hian Chennai an thleng dawn a, basketball hi Coimbatore-ah an khelh dawn avangin Tamil Nadu khawpui aṭangin bus hmangin inelna neihna tur hi an pan dawn a ni.

Mizoram hi infiamna dang weightlifting, table tennis leh wrestling-ah te an tel bawk dawn, infiamna dang pali aiawhte hian karleh lam hian Tamil Nadu an pan ve thung ang. Mizoram team hi Sports & Youth Services tirh a ni a, SYS hnuaia chief coach hna thawk mektu K. Lalthlengliana chu Chef De Mission a ni dawn.

Mizoram hi infiammna pariata tel tur an ni a, medal beiseiawmna badminton-ah erawh H. Lalṭhazuala a inhliam avangin an tel thei dawn ta lo. Ṭhazuala hi MBA Championship-a champion thei naupang ber a ni a, nikum khan All India Sub Junior (Under 17) Ranking Badminton Tournament-ah a champion.

All India Junior Junior Ranking Prize Money Badminton Tournament (Under 19)-ah pawh Ṭhazuala hi champion rinkai ni mah se final-ah a ke ulh vangin a vanduai. Nikum November thlaa inelnaa a inliam hi a la dam chian loh avangin Khelo India-ah hian a inlan thei dawn lo a ni.

Khelo India Youth Games-ah hian a duh nazawng tel theih a ni lo a, wildcard an hmu a nih ngawt loh chuan mahni discipline-a India ram puma ti ṭha bikte chauh tel theih a ni.