South Korea-in hnehna an chang nghal

Asian Cup khelh meka an match hmasa berah South Korea-in hnehna chang turin harsatna an tawk lo a, Bahrain chu 3-1 in an hneh - player langsar ber erawh Son Heung-Min ni loin Paris Saint-Germain attacking midfielder Lee Kang-in a ni a, goal hnih a khung.

Thawhṭanni zan Asian Cup inkhel dangah Iraq chuan 3-1 a Indonesia hnehin, group D-ah Japan elpui ber ni turin an ṭha tawk tih an pholang a, Jordan chuan 4-0 ngawtin Malaysia an sawp bawk.

Asian Cup hi vawiin lamah khelh chhunzawm tur niin, match hnih a awm dawn a, tlai dar 5:00-ah Lebanon leh China inkhelin, zan dar 8:00-ah Tajikistan leh inelna thlengtu Qatar an inhmachhawn bawk ang.

South Korea an ṭha

Jassim Bin Hamad Stadium-ah South Korea tan Bayern Munich defender Kim Min-Jae, Red Star Belgrade midfielder Hwang In-beom, Tottenham Hotspur captain Son Heung-Min, Danish Superliga club Midtjylland striker Cho Gue-sung leh Mainz 05 attacking midfielder Lee Jae-Sung ten bul an ṭan thei.

Bahrain erawhin player langsar sawi tur an nei ve lo a, European football khel an neih awmchhun chu Abdulla Yusuf Helal niin, Czech First League club Mladá Boleslav forward hi bench lamah dah a ni.

Team pahnih an inbuk tawk lo a, mi tam takin chak tur chiangah South Korea an dah. Mahse, rin loh takin Ali Madan chuan Bahrain tan chance duhawm zet a nei a, goal chhuah lo South Korea an vannei takzet.

A tak ram

Taegeuk Warriors (South Korea sawina) in inthlahdah a thiang lo tih hriain, na takin Bahrain an nawr chhunzawm a, minute 38-naah Hwang In-Beom chuan goal hmahruai a khung ta nge nge - mahse, goal dang lut loin chawlhlawk an hmang.

Bahrain an beidawng duh bik lo. Second half-ah Abdullah Duaij hmangin si phurh an rawn sut a, South Korea an barakhaih chiang hle. Mahse, team ṭha zawk danglamna a lang zui a, South Korea-in minute nga hnuah Lee Kang-in hmangin hmahruaina goal an khung nawn.

PSG attacking midfielder hian a ṭha ve tawk tih pholangin, chakna goal a khung zui bawk a, hun tawp thlenga goal dang lut tawh loin South Korea hian 3-1 in hnehna an chang a ni.

Result dang

Group B inkhel dangah Jordan-in hnehna chang turin harsatna an tawk lo a, Malaysia chu 4-0 ngawtin an sawp. Jordan tan Mahmoud Al-Mardi leh Mousa Al-Tamari te chuan goal hnih ve ve an khung a, Al-Tamari goal khung pakhat zawk hi penalty aṭanga lut a ni.

Hetihlai hian Asian football-a team langsar zinga mi Iraq pawhin an thiam an la theihnghilh lo a, Indonesia chu 3-1 in an hneh. Iraq tan Mohannad Ali Kadhim chuan minute 17-naah goal hmahruai a khung a, Belgian second division club Deinze attacking midfielder Marselino Ferdinan chuan Indonesia tan a chhanglet.

Indonesia hian tun hnaiah Indonesian thisen kai, European football-a khelte ram tan an ko nasa a, Iraq tan beisei angin a awlsam lo. Mahse, tawnhriat nei ṭha zawk an nihna an chhawr ṭangkai a, Osama Jabbar leh Ayman Hussein hmanga khung lehin, 3-1 in an chak daih.