Match hmasa berah Osaka a tla

World number 1 hlui a ni a, inelna lian Grand Slam bikah pawh vawi li ngawt a champion tawh - nau a neih avanga a chawlh reng hnuah Naomi Osaka chuan tennis a khel leh a, a beisei ang result erawh a nei thei rih lo.

Australian Open 2024 khelh laiah Osaka hian Thawhṭanni zan khan a match hmasa ber khelin, a khingpui Caroline Garcia lakah 6-4, 7-6 (7-2) in a chak lo a, hneh nei loin a zinkawng a tawp nghal.

US Open 2022 hnuah Osaka tan major tournament a khelh lehna hmasa ber a ni a, a tan thil a awlsam vek lo. Australian Open hi vawi hnih a champion tawhna ni mah se, seeded 16-na Garcia lakah set a la lo.

Japanese nula Osaka chuan, "Ka theih ang tawpa ṭha chuan ka bei a, ka khel chhe loah ka ngai bawk. Hnehna chan duhin bei viau mah ila kei aiin Caroline Garcia khan a khel ṭha zawk a, ka tawn kawng a inhawng lo," a ti.

Nimin khan world number 1 leh seeded pakhatna ni bawk Iga Swiatek a inlan a, darkar khat leh minute 51 chhungin Swiatek hian a khingpui Sofia Kenin chu 7-6 (7/2), 6-2 in a hneh.

Kenin hian tun hmain Australian Open nomawi hi a lo chawi tawh a, a inkhelh thiamna hmun a ni - Swaitek tan pawh Grand Slam first round harsa tak a ni a, a tawpah erawh a ṭha zawk a nihna a lang.

Polish nula Swiatek chuan, "French Open 2020 final khan kan intawng tawh a, a hnu lamah chuan tun ṭum hi kan intawn lehna hmasa ber a ni. Tun season atana Grand Slam hmasa ber a ni a, match hmasa ber a nih bakah player ṭha hmachhawn chu a awlsam lo.

"Set khatna kha vannei takin ka la, set hnihnaah khan game hnih chauh hloh mah ila a harsa hle. Inkhel harsa ka paltlang theih avangin ka lawm," tiin inrintawkna a neih belh thu a sawi bawk.

Kum 22 mi Swiatek hian a match hnuhnung 17-ah hnehna a chang vek, season hmasa tawp lam khan Beijing leh Cancun lamah hlawhtlinna a chang a, world number 1 dinhmun a hloh tawh pawh a neih kir leh theih phah a ni.

Inkhel dangah Sloane Stephens a chak. American player hian US Open 2017 nomawi kha a chawi thei a, hard court-a inkhel thiam ni mah se atan Australian Open hi hmun ṭha a ni lo.

Kum nga chhung chu Melbourne Park-ah Stephens hian chak ni hmel a hmu lo, tunah erawh a record duhawm lo tak hi thaibo turin wildcard hmanga inlan Olivia Gadecki chu 6-3, 6-1 in a hneh.