Khalid-a'n semifinal-ah Jamshedpur a hruai thleng

Aizawl FC coach hlui Khalid Jamil-a'n Jamshedpur FC a enkawl hnuah match hnih khelhpuiin a chakpui ve ve - Men of Steel hi Indian Super Cup-ah an inlan a, an match hmasa berah NorthEast United chu 2-1 in an hneh a, Thawhṭanni zan khan anmahni ang thoa Indian Super League club Kerala Blasters chu 3-2 a hnehin semfinal an lut.

Blasters hian Dimitrios Diamantakos hmangin hmahruaina goal khung mah se Jamshedpur hian Daniel Chima Chukwu goal hnih hmangin an chhanglet. Greek striker Diamantakos hian si phurh a sut leh a, mahse, Jérémy Manzorro hmangin Jamshedpur-in chakna goal an khung zui - hun pek belha Chima red card hmuhin JFC a nghawng phak lo.

Nimin khan Chennaiyin chuan 2-0 in Gokulam Kerala an hneh bawk a, Irfan Yadwad leh Connor Shields ten Chennaiyin tan goal khat ve ve an khung a, I League club-in a chhanletna tur an nei lo.