Goal nga khung thei Atalanta

Serie A team zinga attacking football hmuhnawm chhawp chhuak ṭhin Atalanta chu an la hmuhnawm reng. Thawhṭanni zan khan Atalanta hian Frosinone chu 5-0 a sawpin point thum an hlawh chhuak.

Atalanta tan hian Teun Koopmeiners, Ederson leh Charles De Ketelaere te chuan a tir lam minute riat chhungin goal khat ṭheuh an khung hman a, hun tawp dawn lamah Davide Zappacosta leh Emil Holm ten an belh - a tir ṭan fuhin a tawp an khar ṭha hle.

Gian Piero Gasperini naute hian Serie A match 20 aṭangin point 33 an hmu a, khelh zat inangah an chunga awm palina Fiorentina an phak lohna chu point khat chauh a ni - season thara Champions League khel turin beisei an nei sang zel.

Atalanta manager Gian Piero Gasperini chuan, "A tir lama kan khelh dan kha chu lemchan thawnthu ngaihnawm ang mai a ni, goal thum kan khung a ni satliah lo a, goal ṭha leh mawi vek a ni bawk.

"Ka naute chungah hian engtik lai pawhin rinna ka nghat a, an theihna hi ka ringhlel ngai lo. Ka duh leh beisei ang ngeia an khelh theih avangin ka lawm, goal khung chauh ni loin a venhim lam pawh kan thawk ṭha hle.

"Champions League khelh leh khelh loh chungchang zawhna hi a tam a, ka chhanna chu team lian dangte ang bawkin keini pawin UCL khelh kan tum, team tam tak kan inel avang erawh chuan a awlsam dawn lo," a ti.